ԵՐԵՎԱՆ, 24 հոկտեմբերի – Sputnik. Հայաստանում շինարարության ժամանակ աղբի տեղափոխման վերահսկողությունը նախատեսվում է վերապահել միայն տեղական ինքնակառավարման մարմիններին։ Ազգային ժողովում այս մասին ասաց ՀՀ վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Պետրոս Մարտիրոսյանը` ներկայացնելով «Մթնոլորտային օդի պահպանության մասին» օրենքում փոփոխություններ և լրացումներ կատարելու մասին և «Վարչական իրավախախտումների վերաբերյալ օրենսգրքում» փոփոխությունների կատարելու մասին օրինագծերի փաթեթը։
Մարտիրոսյանն ընդգծեց, որ օրինագիծը վերաբերում է շինարարությունից գոյացած աղբը տեղափոխելու գործընթացը կարգավորելուն։ Ցանկանում են վերացնել իրավասու պետական մարմինների վերահսկողական գործառույթները մեկը մյուսի վրա դնելու ինստիտուտը։
«Տվյալ օրենքում նախատեսվում է սահմանել, որ տնտեսվարողները պարտավոր են հատուցել վերոնշյալ կարգով գնահատված վնասը։ Հատուկ սահմանված երթուղով և հատուկ հատկացված վայրեր շինարարական աղբի տեղափոխման նկատմամբ վերահսկողությունն էլ առաջարկվում է վերապահել միայն մեկ կառույցի` տեղական ինքնակառավարման մարմիններին»,– նշեց նա։
ՔՊ–ական պատգամավոր Սերգեյ Բագրատյանի կարծիքով` այն, որ կոնկրետացվում է հասցեատերը, թե ով պետք է շինաղբի տեղափոխման վերահսկողությունն իրականացնի, կարևոր է, բայց կա մի խնդիր։ Նրա խոսքով` համայնքների համար խիստ դժվար խնդիր կլինի մթնոլորտի աղտոտվածության աստիճանը չափելը, քանի որ նրանք չունեն համապատասխան սարքավորումներ։ Նրանք չեն կարող տուգանքի չափ որոշել` ելնելով օդի աղտոտվածության աստիճանից։ Ըստ Բագրատյանի` տուգանքների չափերի հնարավոր սահմանները նույնպես պետք է ճշգրտել կոռուպցիոն ռիսկերից զերծ մնալու համար։
Պետրոս Մարտիրոսյանն ընդգծեց, որ վնասը հաշվարկելու հնարավորությունը նախատեսում են կառավարության համար։ Կարգը կմշակի շրջակա միջավայրի նախարարությունը։ Նա նշեց` վարչական պատասխանատվությունն այժմ 150 000-300 000 դրամի սահմաններում է, բայց վստահ է` շինարարություն իրականացնողի համար այդ գումարը խնդիր ստեղծող չափ չէ։ Մարտիրոսյանի խոսքով` հնարավոր է, որ առաջիկայում վարչական պատասխանատվության չափերի հետ կապված հանդիպում լինի խորհրդարանում։