ԵՐԵՎԱՆ, 24 հոկտեմբերի – Sputnik. Հայաստանի բարձրագույն դատական խորհուրդը Վճռաբեկ դատարանի քրեական պալատի դատավորի թափուր տեղի համար առաջադրել է ՀՀ հակակոռուպցիոն կոմիտեի նախագահ Սասուն Խաչատրյանի եղբորը` Դավիթ Խաչատուրյանին։
ԲԴԽ նախագահ Կարեն Անդրեասյանը ներկայացրեց Խաչատուրյանի կենսագրականը` նշելով, որ նա ավարտել է ԵՊՀ իրավաբանության ֆակուլտետը, իրավաբանական գիտությունների թեկնածու է։ Խաչատուրյանի աշխատանքային կարիերան սկսվել է դատարանների խորհրդի աշխատակազմից, աշխատել է նաև ԱՄՆ առաքելության թմրադեղերի դեմ պայքարի և իրավական համագործակցության բաժնում։ Եղել է նաև Արդարադատության ակադեմիայի պրոռեկտոր, դասախոս, ԵՊՀ–ում էլ ասիստենտ դասախոս է եղել։ Աշխատել է տարբեր այլ կազմակերպություններում։
Դավիթ Խաչատուրյանը 2021 թվականից մինչ օրս (ընտրվել է 5 տարի ժամկետով. խմբ.) Բարձրագույն դատական խորհրդի անդամ է։
ՔՊ–ական պատգամավոր Սոնա Ղազարյանը քննարկման ընթացքում թեկնածուից հարցրեց, թե որն է նրա մոտիվացիան, այն դեպքում, երբ ԲԴԽ–ում գործն ավարտին չի հասցրել։
«Դատական կարիերաս սկսել եմ Վճռաբեկ դատարանից։ Իմ գիտելիքներն այստեղ գործածելու համար ես ԲԽԴ–ում փորձ եմ ձեռք բերել։ Ես իմ աշխատանքն իրականացված համարում եմ ոչ թե ժամկետի առումով, այլ այն, որ իմ պոտենցիալի 90 տոկոսն արդեն իրացրել եմ ԲԴԽ–ում»,– ասաց Դավիթ Խաչատուրյանը։
Նա շեշտեց` եթե իր կատարած բոլոր գործերը գումարեն իրար ու բաժանեն 5 տարվա մեջ, ամբողջն արել է։
Վճռաբեկ դատարանի քրեական պալատի դատավորի թափուր տեղի համար առաջադրվել են նաև փաստաբան Անահիտ Հակոբյանն ու դատավոր Սամվել Շահվերդյանը։