ԵՐԵՎԱՆ, 24 հոկտեմբերի – Sputnik. Հանրապետականների մեծամասնությունը փակ քվեարկությունից հետո պաշտպանել է կոնգրեսական Թոմ Էմմերի (Մինեսոտայից) առաջադրումը որպես ԱՄՆ Կոնգրեսի Ներկայացուցիչների պալատի նախագահի պաշտոնի նոր թեկնածու։ Այս մասին հայտնում են ամերիկյան առաջատար լրատվամիջոցները, փոխանցում է ՏԱՍՍ-ը։
Այժմ Էմմերին անհրաժեշտ է ձայներ հավաքել Ներկայացուցիչների պալատի լիագումար նիստում խոսնակ ընտրվելու համար:
Որպեսզի նա կարողանա անհրաժեշտ 217 ձայնը ստանալ, նա պետք է հաղթահարի ներկուսակցական տարաձայնությունները Կոնգրեսի ստորին պալատի հանրապետականների միջև։
Հանրապետականները նախկինում անցկացրել են քվեարկության մի քանի փուլ, որի արդյունքում դուրս են մնացել կոնգրեսականներ Ջեք Բերգմանը (Միչիգանից), Փիթ Սեշնսը (Տեխասից), Օսթին Սքոթը (Ջորջիայից), Քևին Հերնը (Օկլահոմայից), Բայրոն Դոնալդսը (Ֆլորիդայից): Մայք Ջոնսոնը (Լուիզիանայից) և Գարի Փալմերը (Ալաբամայից): Կոնգրեսի Ներկայացուցիչների պալատի նախագահի պաշտոնը երրորդն է ԱՄՆ կառավարության հիերարխիայում:
Հոկտեմբերի 3-ին Ներկայացուցիչների պալատը քվեարկեց խոսնակի պաշտոնից հանրապետական Քևին Մաքքարթիի հրաժարականի օգտին: Սա հակասություններ առաջացրեց հանրապետական կոնգրեսականների շրջանում: Հանրապետական Պատրիկ Մաքհենրին նշանակվել է ժամանակավոր խոսնակ:
Քանի դեռ Ներկայացուցիչների պալատը խոսնակ չի ընտրել, չի կարող բյուջեի շուրջ բանակցություններ վարել կամ օրենքներ ընդունել: