ԵՐԵՎԱՆ, 24 հոկտեմբերի – Sputnik. Կարմիր խաչի միջազգային կոմիտեի ներկայացուցիչներն օրերս այցելել են ՀՀ սահմաններն ապօրինի հատած և կալանավորված ադրբեջանցի զինծառայողներ Աղշին Բաբիրովին և Հուսեյն Ախունդովին։ Sputnik Արմենիայի հետ զրույցում տեղեկությունը հայտնեց Կարմիր խաչի հայաստանյան գրասենյակի հաղորդակցության ծրագրերի պատասխանատու Զառա Ամատունին։
«Աշխատակիցներն առանձնազրույցներ են ունեցել նրանց հետ, ինչպես նաև իրենց ընտանիքների հետ կապ հաստատելու հնարավորություն են ընձեռել»,– տեղեկացրեց Ամատունին:
Հիշեցնենք, որ Հուսեյն Ախունդովն ու Աղշին Բաբիրովը ՀՀ սահմանը հատել էին Նախիջևանի կողմից և Հայաստանի տարածքում հայտնվել այս տարվա ապրիլին: Ախունդովը ապրիլի 12-ին Կապան համայնքի Շղարշիկ գյուղի մոտ սպանել էր Զանգեզուրի պղնձամոլիբդենային կոմբինատի անվտանգության աշխատակից Հայրապետ Մելիքսեթյանին:
Երկու զինվորների դեմ էլ քրեական գործ է հարուցվել մի շարք հոդվածներով։ Ընդհանուր մեղադրանքների թվում է մի խումբ անձանց հետ նախնական համաձայնությամբ պետական սահմանի ապօրինի հատումը։
Հունիսի 21-ին Սյունիքի մարզի առաջին ատյանի դատարանը Զանգեզուրի պղնձամոլիբդենային կոմբինատի անվտանգության աշխատակցին սպանելու մեջ մեղադրվող Հուսեյն Ախունդովին դատապարտեց 20 տարվա ազատազրկման։
Աղշին Բաբիրովն էլ սահմանն ապօրինի հատելու, սահմանով զենք-զինամթերք տեղափոխելու համար դատապարտվել է 11 տարի 6 ամիս ազատազրկման: