ԵՐԵՎԱՆ, 23 հոկտեմբերի – Sputnik. Շիրակի մարզում Հյուսիս-հարավ ճանապարհի շինարարության ժամանակ նորից ոսկորներ են հայտնաբերվել։ Sputnik Արմենիայի հետ զրույցում տեղեկությունը հայտնեց ՀՀ ԳԱԱ Հնագիտության և ազգագրության ինստիտուտի գիտաշխատող Արթուր Պետրոսյանը
Shamshyan.com-ը հոկտեմբերի 21-ին տեղեկացրել էր, որ Ազատան-Բենիամին հատվածում մարդկային գանգեր, կմախքներ ու ոսկորներ են հայտնաբերվել:
«Այսօր մենք այնտեղ նոր ոսկորներ ենք տեսել, բայց դրանք հաստատ ո՛չ նոր են, ո՛չ էլ հնագիտական արժեք են ներկայացնում։ Այս տարածքում 19-րդ դարում՝ 1804 և 1826 թվականներին, ռուս–պարսկական պատերազմներ են եղել։ 1826 թվականին տարածքի (որտեղ հիմա Ազատանն է) բնակիչները պաշտպանվել են պարսիկներից։ Դրանք այդ ժամանակների ոսկորներ են, քանի որ ոսկորն այդ վիճակի է հասնում շուրջ երկու հարյուր տարվա ընթացքում»,- ասաց Արթուր Պետրոսյանը, որն ընդգրկված է շինաշխատանքներ իրականացնող կազմակերպության հնագիտական խորհրդում։
Նա հերքեց նաև ոսկորներն այդ տարածքում գտնվող մատուռի հետ կապելու ենթադրությունները` նշելով, որ մատուռն անհամեմատ նոր է։
Պետրոսյանը պատմեց, որ շինարարություն իրականացնող աշխատակիցները հոկտեմբերի 21-ին հայտնաբերված ոսկորների մասին առաջինը տեղյակ են պահել մասնագետներին, բայց տեղ հասած իրավապահները ոչ միայն թույլ չեն տվել, որ աշխատակիցը մոտենա, այլև ոսկորները տարել են իրենց հետ։
Այս պահին ոսկորները գտնվում են իրավապահ մարմինների մոտ։
Մասնագետը հնարավոր է համարում, որ տարածքում կրկին ոսկորներ հայտնաբերվեն։