ԵՐԵՎԱՆ, 23 հոկտեմբերի – Sputnik. ՀՀ պաշտպանության նախարար Սուրեն Պապիկյանը հայ-ֆրանսիական երկկողմ պաշտպանական համագործակցությանն ու տարածաշրջանային անվտանգությանն առնչվող հարցեր է քննարկել Ֆրանսիայի Ազգային ժողովի ազգային պաշտպանության և զինված ուժերի հանձնաժողովի նախագահ Թոմա Գասիյոի և արտաքին հարաբերությունների հանձնաժողովի նախագահ Ժան-Լուի Բուրլանժի հետ: Տեղեկություն հայտնում է ՀՀ պաշտպանության նախարարությունը։
«Պաշտպանության նախարարը ֆրանսիացի խորհրդարանականներին շնորհակալություն է հայտնել համագործակցության զարգացմանն աջակցելու և ազգային ու եվրոպական հարթակներում հայանպաստ գործունեություն ծավալելու համար»,– ասված է հաղորդագրությունում:
Հիշեցնենք` Հայաստանի պաշտպանության նախարարությունն այսօր հայտնեց, որ Պապիկյանն ու Ֆրանսիայի զինված ուժերի նախարար Սեբաստիան Լըկորնյուն երկկողմ համագործակցության մասին փաստաթղթեր են ստորագրել։ Հանդիպմանը ամփոփվել են 2022 թ. սեպտեմբերին և այս տարվա հունիսին Փարիզում տեղի ունեցած քննարկումների արդյունքում ձեռք բերված պայմանավորվածությունների իրականացման ուղղությամբ տարվող աշխատանքների ընթացքը, նախանշվել են համագործակցության զարգացման նոր հնարավորությունները, որոնք ներառում են պաշտպանական համակարգերի ձեռքբերմանը, ռազմական կրթությանը, վերապատրաստումներին, փորձի փոխանակմանը վերաբերող և փոխադարձ հետաքրքրություն ներկայացնող այլ հարցեր
Ըստ «Reuters»–ի` Հայաստանը Ֆրանսիայից GM200 ռադիոլոկացիոն երեք կայան է գնելու։