ԵՐԵՎԱՆ, 23 հոկտեմբերի – Sputnik. ՀՀ–ում 7 ամսվա ընթացքում ֆունկցիոնալության գնահատման նոր մեթոդներով առաջին անգամ դիմել է 11.000 քաղաքացի, որոնցից 8600-ի նկատմամբ գնահատումն իրականացվել է։ Այս մասին Հայաստանում հաշմանդամության համակարգի բարեփոխմանը նվիրված աշխատաժողովի շրջանակում Sputnik Արմենիայի հետ զրույցում ասաց ՀՀ աշխատանքի և սոցիալական հարցերի նախարարի տեղակալ Տաթևիկ Ստեփանյանը։
Նշենք, որ Հայաստանում հաշմանդամության գնահատման համար առաջին անգամ դիմողների նոր մոդելը կիրառվում է 2023 թվականի փետրվարի 1-ից։ Բժշկասոցիալական փորձաքննության փոխարեն իրականացվում է անձի ֆունկցիոնալության գնահատում, այսինքն` բազմակողմանի է արվում ամեն ինչ` ոչ միայն անձի ախտահարված օրգանհամակարգերի և մարմնի կառուցվածքի, այլև կարողությունների և կատարողականի տեսանկյունից։
«Շուրջ 7 ամսվա ընթացքում արդեն դիմել է մոտ 11.000 քաղաքացի և նրանցից 8 600-ի նկատմամբ իրականացվել է անձի ֆունկցիոնալության գնահատում։ Նրանց նկատմամբ սահմանվել է այս կամ այն աստիճանի ֆունկցիայի խանգարում։ 2024 թվականի հունվարի 1-ից մյուս քաղաքացիները ևս պետք է դիմեն և անցնեն գնահատման համակարգով»,– ասաց Ստեփանյանը։
ՀՀ ԱՍՀ նախարար Նարեկ Մկրտչյանն էլ աշխատաժողովի ընթացքում ընդգծեց, որ այս համակարգի բարեփոխումները ՀՀ–ում լավագույն փորձն են, որոնք միջազգայնորեն կիրառվել են։
Հայաստանում ավելի քան 193.000 հաշմանդամություն ունեցող անձ կա (նրանցից ավելի քան 90.137-ը երեխաներ են)։ Այս տվյալները 2022 թվականի դեկտեմբերի 31-ի դրությամբ են, այսօր արդեն նրանց թիվը փոխվել է։