ԱՄՆ–ն Ուկրաինայի փոխարեն հրետանային արկեր կփոխանցի Իսրայելին. The New York Times

ԵՐԵՎԱՆ, 22 հոկտեմբերի – Sputnik. ԱՄՆ ՊՆ ներկայացուցիչը հայտարարել է, որ Ուկրաինային խոստացած (և որի պակասից բողոքում էր Ուկրաինայի ԶՈւ–ն) տասնյակ հազարավոր 155–մմ հրետանային արկերը կփոխանցվեն Իսրայելին։ Գրում է The New York Times–ը` հղում անելով Պենտագոնում իր աղբյուրներին։

Նախագահ Ջո Բայդենը փորձել է հասկացնել, որ ԱՄՆ–ն մի հակամարտությունը մյուսից առաջնահերթ չի համարում, բայց բոլորի համար պահանջարկը բավարարել դժվար կլինի, գրում է հոդվածի հեղինակը։

Axios պարբերականն իր հերթին գրում է, որ Իսրայելը ԱՄՆ–ին է հայտնել Գազայի հատվածում ցամաքային ներխուժման պատրաստվելու և իսրայելա–լիբանանյան սահմանի ողջ երկայնքով պատերազմի պոտենցիալ սրացման համար հրետանային արկերի սուր անհրաժեշտություն ունենալու մասին։

Ավելի վաղ իր ուղերձում Բայդենը հայտարարել էր, որ Կոնգրես հրատապ հայտ կուղարկի Իսրայելի և Ուկրաինայի ֆինանսավորման վերաբերյալ։ ԱՄՆ նախագահը դա «խելամիտ ներդրում է» անվանել, որը ապագայում նոր սերունդներին դիվիդենտներ կբերի։

Խոսքը, որոշ տվյալներով, 100 մլրդ դոլարի մասին է, որից 60-ը կուղղվի Կիևին, 10-ից ավելին` Իսրայելին, մնացածը` Թայվանի ռազմական աջակցությանն ու Մեքսիկայի հետ ԱՄՆ–ի սահմանների ամրապնդմանը։

2022 թվականի փետրվարից Վաշինգտոնը Կիևին 43 մլրդ դոլարի ֆինանսական օգնություն է ուղարկել, այս տարի` 10.9 մլրդ դոլար։