ԵՐԵՎԱՆ, 21 հոկտեմբերի – Sputnik. Լեռնային Ղարաբաղում տեղի ունեցածը Ռուսաստանն ընկալում է որպես սեփական ողբերգություն։ Այս մասին հայտարարել է ՀՀ–ում ՌԴ դեսպան Սերգեյ Կոպիրկինը Հայաստանում ռուսաստանցի հայրենակիցների 15-րդ համաժողովում:
«Մեր համաժողովը անցնում է արտասովոր պայմաններում ՝ ժամանակակից Հայաստանի պատմության ամենամռայլ էջերից մեկի ֆոնին։ Մենք ականատես եղանք, թե ինչպես Լեռնային Ղարաբաղի ավելի քան 100 հազար բնակիչներ՝ հայեր և ռուսներ, ստիպված եղան լքել իրենց հայրենիքը։ Այս ողբերգության առաջին իսկ օրերից Ռուսաստանի կողմից աջակցություն է ցուցաբերվում ինչպես մասնավոր կազմակերպությունների, այնպես էլ պետական մակարդակով։ Ռուսաստանի կողմից դա ընկալվում է որպես սեփական ողբերգություն»,- ասել է Սերգեյ Կոպիրկինը։
Հայաստանում ռուսական տան ղեկավար Վադիմ Ֆեֆիլովն իր հերթին ընդգծել է, որ Ռոսսոտրուդնիչեստվոն վերանայել է իր առաջնահերթությունը և կենտրոնացել Լեռնային Ղարաբաղից տեղահանվածներին մարդասիրական օգնություն տրամադրելու վրա:
Լեռնային Ղարաբաղի ռուսական համայնքի ղեկավար Ալեքսանդր Բորդովը, որը վերջին ողբերգական իրադարձությունների ականատեսն է, նշել է, որ Լեռնային Ղարաբաղից տեղահանվածների մի մասը, որոնք ռուսաց լեզվի կրողներն են, Հայաստանում կամրապնդեն ռուսական մշակույթը։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով` ՀՀ–ում Արցախից բռնի տեղահանված 101 848 անձ է հաշվառվել և նույնականացվել։