ԵՐԵՎԱՆ, 21 հոկտեմբերի – Sputnik. Իսրայելի ազգային անվտանգության խորհուրդը Եգիպտոսում և Հորդանանում գտնվող իսրայելցիներին հորդորել է անհապաղ լքել այդ երկրները։ Տեղեկությունը հայտնում է ՌԻԱ Նովոստին` հղում անելով Իսրայելի վարչապետի գրասենյակին:
«Իսրայելի ազգային անվտանգության խորհուրդը Եգիպտոսում (ներառյալ Սինայը) և Հորդանանում գտնվող իսրայելցիների համար նախազգուշացման 4-րդ մակարդակ է հայտարարել (բարձր սպառնալիք) և հորդորում է հրաժարվել այդ երկրներ մեկնելուց: Նշված երկրներում գտնվող քաղաքացիները պետք է հնարավորինս շուտ լքեն այդ տարածքները», - ասվում է հայտարարության մեջ:
Դեպի Մարոկկո մեկնել ցանկացողների համար ևս նախազգուշացում է հայտարարվել (սպառնալիքի 3–րդ մակարդակ)։ Խորհուրդ է տրվում չայցելել երկիր, եթե չկա խիստ անհրաժեշտություն։
Իսրայելի ազգային անվտանգության խորհրդից նշել են, որ հակամարտության շարունակման ֆոնին վերջին օրերին աշխարհի տարբեր երկրներում, հատկապես Մերձավոր Արևելքում, արձանագրվել է հակաիսրայելական բողոքի ակցիաների հերթական սրացում՝ իսրայելական և հրեական խորհրդանիշների նկատմամբ թշնամանքի և բռնության դրսևորումներով:
Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին:
Վերջին տվյալներով` Գազայի հատվածում զոհերի թիվը գերազանցել է 4000-ը, իսկ Իսրայելի զոհված բնակիչներինը` հազարը։ Տարբեր գնահատականներով՝ ՀԱՄԱՍ-ը գերի է վերցրել շուրջ 250 մարդու։