Լուրեր

▪️ Երևանի ավագանու արտահերթ նիստում նշանակվելու են Երևանի քաղաքապետի տեղակալները։ Առաջին տեղակալի պաշտոնին հավակնում է ՔՊ վարչության անդամ, ԱԻ նախկին նախարար Արմեն Փամբուխչյանը, իսկ քաղաքապետի տեղակալների թեկնածուներ են ՔՊ-ական Լևոն Հովհաննիսյանը, Սուրեն Գրիգորյանը և «Հանրապետություն» կուսակցության անդամ Սարգիս Մադաթյանը:

▪️ Սոցիալական ցանցում Հայաստանի վարչապետի ձայնի նմանակմամբ ու պատկերի օգտագործմամբ, իբր 100 հազար դրամ վաստակելու մասին հայտարարության տեսանյութի հրապարակման դեպքի առթիվ քրեական վարույթ է նախաձեռնվել։

▪️ Հոկտեմբերի 20-ին Ռուս-հայկական մարդասիրական արձագանքման կենտրոնը ավելի քան 1.5 տոննա մարդասիրական օգնություն, այդ թվում՝ մահճակալներ և տաք ծածկոցներ է հասցրել Սևանի և Գավառի համայնքապետարաններ՝ Արցախից բռնի տեղահանվածների համար: Կենտրոնից հայտնում են, որ շուտով նույնպիսի աջակցություն կտրամադրվի նաև այլ մարզերի։

▪️ Հոկտեմբերի 26-ին Բիշքեկում առցանց ձևաչափով նախանշված է Եվրասիական միջկառավարական խորհրդի նիստը, հայտնել է Եվրասիական տնտեսական հանձնաժողովի պաշտոնական ներկայացուցիչ Իյա Մալկինան: Նրա խոսքով՝ կառավարությունների ղեկավարները կքննարկեն ԵԱՏՄ-ի շրջանակում 2030-2045թթ․ ինտեգրացիոն գործընթացների հետագա զարգացման հիմնական խնդիրներն ու առանցքային ուղղությունները:

▪️ «ՎԵՏՕ» շարժման ղեկավար Նարեկ Մալյանը կմնա կալանքի տակ առնվազն մինչև նոյեմբերի 20-ը, հայտնում է Մալյանի պաշտպանը։

▪️ Իսրայելի ազգային անվտանգության խորհուրդը Եգիպտոսում ու Հորդանանում գտնվող իսրայելցիներին հորդորել է անհապաղ լքել այդ երկրները:

▪️ Ամերիկայի Միացյալ Նահանգները դիտարկում է Չինաստանի համար իր սերվերների ամպային ծառայությունների հասանելիությունը սահմանափակելու հնարավորությունները, հայտնում է ճապոնական «Nikkei» բորսայի լրատվական կայքը՝ հղում անելով ԱՄՆ-ի առևտրի նախարարի արդյունաբերության և անվտանգության հարցերով տեղակալ Ալան Էստևեսին։ Վաշինգտոնը մտավախություն ունի, որ Չինաստանն օգտագործելով ամերիկյան սերվերների հզորությունը` ռազմական նպատակների համար արհեստական բանականություն կմշակի։