ԵՐԵՎԱՆ, 18 հոկտեմբերի – Sputnik. ՀՀ վարչապետ Նիկոլ Փաշինյանը Հայաստանում տեղեկատվական տեխնոլոգիաների զարգացման հեռանկարները քննարկել է աշխարհի խոշորագույն և ծրագրային ապահովման առավել դիվերսիֆիկացված ընկերություններից մեկի՝ «Adobe»-ի նախագահ և գլխավոր գործադիր տնօրեն Շանթանու Նարայենի հետ։ Տեղեկությունը հայտնում է ՀՀ վարչապետի մամուլի ծառայությունը։
Նարայենը ՀՀ վարչապետի կողմից արժանացել է ՏՏ ոլորտում համաշխարհային ներդրման համար Հայաստանի պետական մրցանակին:
ՀՀ վարչապետն ասել է, որ Հայաստանում կա ՏՏ ոլորտի զարգացման որոշակի դինամիկա: Ըստ նրա` ՀՀ–ում ոլորտը մոտավորապես երկնիշ աճ է գրանցում. 2022 թ. տվյալով՝ ոլորտում 30 հազարից ավելի մարդ է աշխատում և ոլորտի շրջանառությունը գերազանցել է 1 մլրդ դոլարը:
Նարայենն էլ ասել է, որ Հայաստանում տեսնում է բարձր տեխնոլոգիաների ոլորտի մեծ ապագա: Նա պատրաստակամություն է հայտնել սերտորեն համագործակցել հայ գործընկերների հետ՝ վերջիններիս ներկայացնելով իր փորձն ու կարողությունները:
«Շատ բարձր եմ գնահատում զրույցը, որ այսօր ունեցա ՀՀ վարչապետի հետ: Նա ինձ բազմաթիվ հարցեր տվեց, թե ինչ կպահանջվի ՏՏ զարգացումն ավելի առաջ մղելու համար: Երկուսիս համար շատ լավ զրույց էր, երկուսիս հետաքրքրում էր կրթությունը, տաղանդի թեման և մակրոտնտեսական միջավայրի ստեղծումը, որում ավելի շատ ընկերությունների մեկնարկի հնարավորություններ կլինեն, քանի որ ես իրոք հավատացած եմ, որ ստարտափների համայնքը երկրում կարևոր ցուցիչ է ոլորտի հաջողության համար»,– ասել է նա:
Նարայենի խոսքով` «Adobe»-ը հպարտանում է, որ ՀՀ–ում ունի գիտահետազոտական ներկայություն: Երեկ ընկերությունը բացել է իր նոր շենքը, ինչը, ըստ նրա, վկայում է, որ «Adobe»-ը հավատարիմ է Հայաստանի ժողովրդին և պատրաստ է շարունակել ընդլայնել իր ներկայությունն այստեղ: