ԵՐԵՎԱՆ, 16 հոկտեմբերի – Sputnik. Նախաքննական մարմինը ՀՀ երկրորդ նախագահ Ռոբերտ Քոչարյանի որդու` Լևոն Քոչարյանի կալանքի ժամկետի երկարաձգման միջնորդություն է ներկայացրել։ Sputnik Արմենիայի հետ զրույցում տեղեկությունը հայտնեց Քոչարյանի պաշտպանական թիմից Գայանե Պապոյանը։
«Միջնորդության քննության տեղի և ժամկետի մասին տեղեկություններ դեռևս չկան»,– նշեց Պապոյանը։
Նա հայտնեց, որ միջնորդությունը ներկայացվել է այսօր։
Պապոյանը հիշեցրեց, որ պաշտպանական թիմը նաև բողոք է ներկայացել Լևոն Քոչարյանի նկատմամբ կիրառված խափանման միջոց կալանքի դեմ, որը Վերաքննիչ դատարանը կքննի հոկտեմբերի 19–ին։
Քննությունն իրականացվելու է գրավոր կարգով։
Հիշեցնենք՝ սեպտեմբերի 19–ին Արցախի դեմ սանձազերծված ադրբեջանական նոր ագրեսիայի ֆոնին Երևանում մասշտաբային ցույցեր սկսվեցին։
Սեպտեմբերի 22–ի առավոտից Երևանի տարբեր վարչական շրջաններում քաղաքացիները անհնազանդության ակցիաներ էին իրականացնում։ Կարմիրբերետավորներն Ամիրյան փողոցից բերման ենթարկեցին ցուցարարների մի մասին։ Նրանց թվում էր նաև ՀՀ երկրորդ նախագահի որդին` Լևոն Քոչարյանը։ Ավելի ուշ հայտնի դարձավ, որ նա 1 ամսով կալանավորվել է։
Լևոն Քոչարյանին մեղադրանք է առաջադրվել առ այն, որ սեպտեմբերի 22-ին խաղաղ ցույցի ժամանակ նա չի կատարել կարմիրբերետավորների` ճանապարհը բացելու օրինական պահանջ և բռնություն է գործադրել ոստիկանության ծառայողների նկատմամբ։ Նույն օրը Լևոն Քոչարյանին բերման ենթարկելիս իրավապահները այնպես են հարվածել նրան, որ փակ գանգուղեղային վնասվածք է ստացել։