ԵՐԵՎԱՆ, 15 հոկտեմբերի – Sputnik. Ռուսաստանի օդատիեզերական ուժերը հարվածներ են հասցրել Սիրիայում գրոհայինների ռազմական օբյեկտներին։ Այս մասին հայտարարել է Արաբական Հանրապետությունում պատերազմող կողմերի հաշտեցման ռուսական կենտրոնի ղեկավարի տեղակալ Վադիմ Կուլիտը, հայտնում է ՌԴ ՊՆ կայքը։
Ռուսական հարձակման արդյունքում ոչնչացվել են տասը զինյալներ, շարժական բազմակի արձակման հրթիռային համակարգ և հինգ գրոհային անօդաչու թռչող սարքեր։ Ռուսաստանի զինված ուժերը նաև խոցել են երկու հսկիչ կետեր և ապօրինի զինված խմբավորումների երկու ստորգետնյա ապաստարաններ, ինչպես նաև զենքի հինգ պահեստ։
Իդլիբի դեէսկալացիայի գոտում կան արմատական կազմավորումներ, որոնք անօդաչու թռչող սարքերի և փոփոխված բազմակի հրթիռային համակարգերի օգնությամբ մշտական հարձակումներ են իրականացնում Սիրիայի կառավարության վերահսկողության տակ գտնվող տարածքի վրա։ Վերջին 24 ժամվա ընթացքում այս գոտում ութ հարձակում է գրանցվել կառավարական դիրքերի վրա։
Կուլիտը նշել է, որ նման փորձերը ճնշելու համար ռուսական օդատիեզերական ուժերի կողմից բարձր ճշգրտությամբ հարվածներ են հասցվել զինյալների թիրախներին։