ԵՐԵՎԱՆ, 13 հոկտեմբերի – Sputnik. Արտաշատի մարզադպրոցի դահլիճում մնացել է Լեռնային Ղարաբաղից բռնի տեղահանված միայն 2 ընտանիք։ «Ֆեյսբուք» սոցիալական ցանցի իր էջում այս մասին գրառում է արել ՀՀ տարածքային կառավարման և ենթակառուցվածքների նախարարության մամուլի խոսնակ Սոնա Հարությունյանը։
«Նրանք ևս առաջիկա օրերին կտեղափոխվեն,– նշել է ՏԿԵՆ մամուլի խոսնակը և գրառման մեկնաբանություններում ավելացրել,– այդ ընտանիքները առաջարկ ստացել են, բայց իրենք տարբերակ ունեն, որոշել են այդտեղ գնալ»։
Sputnik Արմենիան հոկտեմբերի 7–ին այցելել էր Արտաշատ քաղաքի կենտրոնում գործող մարզադպրոց, որտեղ մեկ հարկի տակ 104 մարդ էր տեղավորվել։ ՀՀ տարածքային կառավարման և ենթակառուցվածքների նախարար Գնել Սանոսյանն այսօր հայտարարեց, որ Արտաշատի մարզադպրոցի դահլիճում է 1 ընտանիք է մնացել, մյուսներին տեղաբաշխել են։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։