ԵՐԵՎԱՆ, 12 հոկտեմբերի – Sputnik. 2023 թ. հունվար–օգոստոսին ՀՀ–ում արձանագրվել է ծնելիության ամենաբարձր ցուցանիշը վերջին հինգ տարվա համեմատ։ ՀՀ կառավարության նիստում այս հայտարարությունն արեց ՀՀ վարչապետ Նիկոլ Փաշինյանը։
Նա նշեց, որ 2023 թ. 7 ամսում ՀՀ քաղաքացիների թիվն ավելացել է 7 150–ով։
«Սա ժողովրդագրության և առողջապահության ոլորտներում ՀՀ կառավարության վարած քաղաքականության արդյունք է։ Հույս ունեմ, որ այն ծրագրերը, որոնք մենք իրականացնում ենք ԼՂ–ից բռնի տեղահանված մեր հայրենակիցներին աջակցելու համար, կնպաստեն, որ նրանք ՀՀ–ից չհեռանալու որոշում կայացնեն, ու ծնելիության այս ցուցանիշի ավելացում կունենանք»,– ասաց Փաշինյանը։
Վարչապետի խոսքով` այս տարի մեկ այլ դրական ցուցանիշ էլ է արձանագրվել` մեռելածին երեխաների թիվն էականորեն նվազել է։
Ըստ նրա` նորածինների շրջանում մահացությունների թիվը նվազել է նաև այն պատճառով, որ կորոնավիրուսի համավարակի ժամանակ ՀՀ կառավարությունը ճիշտ որոշումներ է կայացրել։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով՝ Արցախից ՀՀ է տեղափոխվել 100 632 մարդ։