ԵՐԵՎԱՆ, 12 հոկտեմբերի – Sputnik. ՌԴ Պետդումայի` Ռուսաստանի ներքին գործերին օտարերկրյա պետությունների միջամտության փաստերի հետաքննության հանձնաժողովի նախագահ Վասիլի Պիսկարյովը հայտնել է, որ ԱՊՀ միջխորհրդարանական վեհաժողովի գործընկերներին կփոխանցի Ռուսաստանում անցանկալի 110 արտասահմանյան հասարակական կազմակերպությունների ցանկը և օտարերկրյա գործակալների ռեեստրը:
«Մեր կարծիքով՝ ԱՊՀ երկրների խորհրդարանականների առաջնային խնդիրը համատեղ հակազդեցությունն է արտաքին միջամտության փորձերին։ ԱՊՀ երկրների գործընկերներին կփոխանցենք Ռուսաստանում անցանկալի 110 արտասահմանյան ՀԿ-ների ցանկը, որոնք սպառնալիք են ներկայացնում մեր պետության անվտանգության համար»,- ասել է Պիսկարյովը։
Քաղաքական գործիչը նշել է, որ հաշվի առնելով Եվրասիական տարածքում սպառնալիքների ընդհանրությունը, փոխանցված տեղեկությունները կարող են նպաստել ԱՊՀ յուրաքանչյուր առանձին պետությունում իրադրության ապակայունացմանն ուղղված արտասահմանյան հատուկ ծառայությունների աշխատանքի կանխմանը, այդ թվում՝ ընտրությունների ընթացքում:
«Կփոխանցենք նաև օտարերկրյա գործակալների ռուսական ռեեստրը։ Մեր երկրում օտար, արտասահմանյան շահերը պաշտպանողների մասին տեղեկատվությունը կարող է հետաքրքիր լինել նաև մեր հարևաններին», - հավելել է նա։
Պսկարյովը նշել է, որ Սանկտ Պետերբուրգում տեղի կունենա «ԱՊՀ ՄԽՎ մասնակից պետությունների ընտրական ինքնիշխանության պաշտպանությունը» խորագրով խորհրդաժողով՝ Բելառուսում քվեարկության միասնական օրվա և 2024 թվականին Ռուսաստանում նախագահական ընտրությունների դիտարկման մոնիտորինգային արշավների նախապատրաստման շրջանակում։