ԵՐԵՎԱՆ, 12 հոկտեմբերի – Sputnik. Լեռնային Ղարաբաղից բռնի տեղահանված անձանց թիվը, որոնք 100 հազար դրամ միանվագ օգնություն են ստացել, հոկտեմբերի 13–ին կդառնա 66 հազար, հաջորդ շաբաթ՝ 85–90 հազար: ՀՀ կառավարության նիստում այս մասին հայտարարեց ՀՀ փոխվարչապետ Տիգրան Խաչատրյանը։
Առաջին փուլով օգնությունն արդեն իսկ փոխանցվել է 52 600 մարդու քարտային հաշիվներին, հոկտեմբերի 13–ին 100 հազար դրամ կստանան ևս 13 500–ը։ Նրանցից 1800–ը երեխաներ են, որոնց անունով միջոցները փոխանցվում են ծնողների դիմումի համաձայն:
Ավելի քան 4000 մարդ ստացել է նոր բացված հաշիվների աջակցություն, քանի որ նրանք չեն ունեցել գործող քարտային հաշիվներ: Փոխվարչապետը հիշեցրեց, որ նրանք, ովքեր ունեն գործող հաշիվներ, գումարը մեխանիկորեն փոխանցվում է այդ հաշիվներին։
Խաչատրյանի խոսքով` հաջորդ շաբաթ երեխաների անունով ավելի քան 23 հազար դիմում կմշակվի։
Վարչապետ Նիկոլ Փաշինյանը նշեց, որ սոցիալական աշխատողները պետք է հետադարձ կապ պահպանեն ԼՂ–ի բոլոր հայրենակիցների հետ, որպեսզի բացառեն այն ռիսկը, որ որևէ մեկը չիմանա, թե ինչպես ստանա օգնությունը:
ՀՀ աշխատանքի և սոցիալական հարցերի նախարար Նարեկ Մկրտչյանն էլ հայտարարեց, որ շատ գյուղերում համայնքապետներն իրենք են մեքենաներ տրամադրում, որպեսզի մարդիկ կարողանան գնալ բանկ ու բացել հաշվեհամար։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով՝ Արցախից ՀՀ է տեղափոխվել 100 632 մարդ։