ԵՐԵՎԱՆ, 9 հոկտեմբերի – Sputnik. Ռոսսոտրուդնիչեստվոն Ռուսական մարդասիրական առաքելության աջակցությամբ հոգեբանական օգնություն կցուցաբերի Լեռնային Ղարաբաղից տեղահանվածներին։ Տեղեկությունը հայտնում է կազմակերպության մամուլի ծառայությունը։
Ռուսական տան տելեգրամյան ալիքում նշվում է, որ հոգեբանասոցիալական կարգավորման կենտրոնի հետ համատեղ ճանապարհային քարտեզ է մշակվել։ Այդ ուղղությամբ համագործակցելու հարցեր են քննարկել Հայաստանում Ռուսական տան ղեկավար Վադիմ Ֆեֆիլովն ու կենտրոնի ղեկավար, Հայկական հոգեբուժական ասոցիացիայի նախագահ Արմեն Սողոյանը։ Պայմանավորվածություն է ձեռք բերվել, որ առաջիկայում Ռոսսոտրուդնիչեստվոն կօգնի ծրագրի գործարկման հարցում։
«Այժմ մասնագետները մոնիտորինգ են իրականացնում Սյունիքում։ Այնուհետև կկազմվեն օգնության կարիք ունեցող մարդկանց ցուցակները։ Ենթադրվում է, որ կենտրոնի աշխատակիցներն առաջին փուլում կընդունեն մինչև 50 տեղահանվածի, խորհրդատվությունները կտևեն 2-6 շաբաթ», – նշվում է հաղորդագրության մեջ։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով՝ Արցախից ՀՀ է տեղափոխվել 100 632 մարդ։