ԵՐԵՎԱՆ, 8 հոկտեմբերի, Sputnik - Խաչիկ Չախոյան. ՈւԵՖԱ–ն պատրաստվում է պատժամիջոցներ կիրառել ֆուտզալի Հայաստանի և Վրաստանի հավաքականների նկատմամբ։ Տեղեկությունը հայտնում է իսպանական «Ռելեվո» պորտալը։
Ըստ պորտալի` էլիտ փուլի նույն խմբում հանդես եկող այս երկու թիմերի մրցակիցները՝ Պորտուգալիան և Ֆինլանդիան, բողոք են ներկայացրել ՈւԵՖԱ, որ Հայաստանի և Վրաստանի հավաքականների կազմում շատ բրազիլացիներ են հանդես գալիս, որոնք ստացել են տվյալ երկրների քաղաքացիություն։
Նշենք, որ Հայաստանի հավաքականի կազմում խաղում են 7, իսկ Վրաստանի հավաքականի կազմում՝ ինը բրազիլացի։
Չնայած որ շատ այլ հավաքականներ էլ կան, որոնց կազմում ֆուտզալի մրցումներում հանդես են գալիս բրազիլացի շատ ֆուտբոլիստներ(օրինակ՝ Ադրբեջան, Ղազախստան, 2004 թ. աշխարհի առաջնությունում՝ նաև Իտալիա), մինչ օրս ոչ մի երկիր դեռ չէր բողոքել բրազիլացիներին քաղաքացիություն տալու և տարբեր երկրների հավաքականներում ընդգրկելու դեմ։
Նշվում է, որ Հայաստանի և Վրաստանի հավաքականներին գրանցվելու է 0։5 հաշվով տեխնիկական պարտություն։ Ի դեպ, մեր հավաքականն անցկացրած երեք խաղերում պարտություն է կրել ու դա նրա համար մեծ պաշվով ոչինչ չի փոխում։ Իսկ թե ինչպիսի արդյունք կարձանագրվի Վրաստան–Հայաստան խաղի համար, որում Վրաստանի թիմը հաղթել էր 2։1 հաշվով, առայժմ հայտնի չէ։