ԵՐԵՎԱՆ, 7 հոկտեմբերի – Sputnik. Արցախի պաշտպանության բանակի նախկին հրամանատարի առաջին տեղակալ, գեներալ-մայոր Դավիթ Մանուկյանը Հակարիի կամուրջն անցնելիս Արցախի նախկին պետնախարար Ռուբեն Վարդանյանի հետ է եղել։ Տեղեկությունը հայտնում է «Հրապարակ» օրաթերթը։
Թերթի տեղեկություններով` Դավիթ Մանուկյանը որոշել է ուղեկցել նախկին պետնախարար Ռուբեն Վարդանյանին՝ համարելով, որ Հակարիի կամուրջը միայնակ անցնելու դեպքում Վարդանյանի ձերբակալության ռիսկերը մեծ են։
«Մանուկյանն անձամբ վարել է Ռուբեն Վարդանյանին տեղափոխող ավտոմեքենան` այդպիսով վտանգելով իր կյանքն ու հայտնվելով գերու կարգավիճակում»,– գրում է պարբերականը` հավելելով, որ Մանուկյանի հետ տարել և մի քանի ժամ պահել են նաև նրա կնոջը, ապա թույլ տվել, որ նա մենակ հատի սահմանն ու գա Հայաստան։
Հիշեցնենք` ադրբեջանական կողմը ձերբակալել է Արցախի նախկին պետնախարար, բարերար Ռուբեն Վարդանյանին, ՊԲ նախկին հրամանատար Լևոն Մնացականյանին, ՊԲ հրամանատարի նախկին տեղակալ Դավիթ Մանուկյանին, Արցախի նախկին արտգործնախարար Դավիթ Բաբայանին, ԼՂ ԱԺ նախագահ Դավիթ Իշխանյանին, Արցախի նախկին նախագահներ Արկադի Ղուկասյանին, Բակո Սահակյանին և Արայիկ Հարությունյանին։