ԵՐԵՎԱՆ, 6 հոկտեմբերի – Sputnik. Մի քանի ժամվա ընթացքում ՀՀ կհասնի Եվրամիության 10 մլն եվրո արժողությամբ հումանիտար օգնությունը ԼՂ–ից բռնի տեղահանվածների առաջնային կարիքները հոգալու համար։ ՀՀ կառավարությունում տեղի ունեցած ճեպազրույցի ժամանակ ասաց ԵՄ ճգնաժամային կառավարման հարցերով հանձնակատար Յանեզ Լենարչիչը։
«Մենք արագ մոբիլիզացանք և հավաքեցինք ավելի քան 10 մլն եվրո՝ ԼՂ–ից տեղահանվածներին օգնելու համար։ ԵՄ–ն լիովին աջակցում է Հայաստանին»,– հայտարարեց նա։
Լենարչիչն ընդգծեց, որ ԵՄ–ն իր համերաշխությունն է հայտնում Հայաստանին, հայերին և հատկապես ԼՂ–ից տեղահանվածներին, ինչպես նաև խստորեն դատապարտում է Լեռնային Ղարաբաղի նկատմամբ ռազմական ագրեսիան, որը հանգեցրել է ավելի քան 100 հազար բնակչության բռնի տեղահանման։
Ըստ նրա` այս իրավիճակում ԵՄ–ն նախատեսում է ակտիվացնել քաղաքացիական պաշտպանության մեխանիզմը։
«Ես ուրախ եմ, որ ԵՄ երկրները կարողացել են արձագանքել, և բազմաթիվ երկրներ արդեն արձագանքել են ու առաջարկել են իրենց աջակցությունը ՀՀ–ին, խոսքը հիմնականում հիգինայի պարագաների, սննդի, դեղերի մասին է։ Այդ երկրներն են Ավստրիան, Բելգիան, Բուլղարիան, Ֆրանսիան, Գերմանիան, Իտալիան, Լիտվիան, Լյուքսեմբուրգը, Լեհաստանը, Իսպանիան, Ռումինիան, Շվեդիան, Նորվեգիան»,– նշեց ԵՄ ճգնաժամային կառավարման հարցերով հանձնակատարը։
Լենարչիչը տեղեկացրեց, որ հիգիենայի պարագաներն ու դեղերն արդեն տրամադրվել են ՀՀ հիվանդանոցներին։
Նրա խոսքով` ճգնաժամային այս փուլի ավարտից հետո ԵՄ–ն հակված է աջակցությունը շարունակելու միջնաժամկետից երկարաժամկետ հատվածում։
Հիշեցնենք, որ ԵՄ ճգնաժամային կառավարման հարցերով հանձնակատար Յանեզ Լենարչիչն այսօր է ժամանել Երևան, որտեղ հանդիպելու է Հայաստանի բարձրաստիճան պաշտոնյաների հետ և այցելելու է վայրեր, որտեղ ապաստան են գտել Լեռնային Ղարաբաղից բռնի տեղահանված անձինք։