ԵՐԵՎԱՆ, 5 հոկտեմբերի – Sputnik. Եվրամիությունը չպետք է հապաղի Հայաստանին 2 միլիարդ եվրոյի ներդրումային փաթեթի տրամադրման մասով, որը ԵՄ–ն խոստացել էր դեռ 2 տարի առաջ։ Այս մասին Գրանադայում` եվրոպական քաղաքական հանրության գագաթնաժողովի շրջանակներում, հայտարարել է Եվրահանձնաժողովի (ԵՄ գործադիր մարմնի) նախագահ Շառլ Միշելը։
«Այս խոստման կատարումը չի կարող հետաձգվել, քանի որ Հայաստանին անհրաժեշտ է աջակցություն Ադրբեջանի ռազմական գործողության հետևանքները հաղթահարելու համար, իսկ Հայաստանի Հանրապետությունում կան բազմաթիվ փախստականներ»,–ասել է նա։
Անդրադառնալով Հայաստանի տարածքային ամբողջականության պահպանմանը, Միշելը նշել է, որ 2 օր առաջ Ադրբեջանի նախագահ Իլհամ Ալիևի հետ հեռախոսազրույց է ունեցել և զրույցի ընթացքում Ալիևը հստակ հայտարարել է, որ Ադրբեջանը տարածքային պահանջներ չունի Հայաստանից։
«Կարծում եմ՝ այս հայտարարությունը պետք է բացահայտ արվի, որպեսզի հստակ լինի երկու երկրների տարածքային ամբողջականության փոխադարձ ճանաչումը»,- ընդգծել է Միշելը։
Հիշեցնենք` այսօր Գրանադայում պետք է կայանար Փաշինյան–Ալիև հերթական հանդիպումը Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի, ԵՄ խորհրդի նախագահ Շառլ Միշելի մասնակցությամբ։ Ադրբեջանական լրատվամիջոցները երեկ հայտնեցին, որ Ադրբեջանի նախագահը հրաժարվել է մեկնել Իսպանիա, պատճառը Ֆրանսիայի «ապակառուցողական» դիրքորոշումն է, ինչպես նաև այն, որ Փարիզն ու Բեռլինը համաձայն չեն, որ Թուրքիայի նախագահ Ռեջեփ Թայիփ Էրդողանը մասնակցի հանդիպմանը։
Ավելի ուշ Փաշինյանը հաստատեց, որ հնգակողմ հանդիպումը չի կայանա, բայց իր գլխավորած պատվիրակությունն այնուամենայնիվ կմեկնի Իսպանիա։
ՀՀ վարչապետն Իսպանիա է մեկնել երեկ` հոկտեմբերի 4-ին։ Նա այսօր Գրանադա քաղաքում մասնակցելու է Եվրոպական քաղաքական համայնքի երրորդ գագաթնաժողովին։
Այսօր հայտնի դարձավ, որ Հայաստանի, Ֆրանսիայի, Գերմանիայի և Եվրոպական խորհրդի առաջնորդները Գրանադայում հանդիպում կանցկացնեն՝ չնայած Ադրբեջանի նախագահ Իլհամ Ալիևի բացակայությանը: