ԵՐԵՎԱՆ, 5 հոկտեմբերի – Sputnik. Ղազախստանի նախաձեռնությամբ սկսվել են ԵԱՏՄ-ում աշխատանքի էլեկտրոնային բորսայի ստեղծման աշխատանքները։ Տեղեկությունը հայտնում է Ղազախստանի առևտրի և ինտեգրման նախարարության մամուլի ծառայությունը։
Նշվում է, որ Եվրասիական տնտեսական միության (ԵԱՏՄ) երկրներում 93 միլիոն աշխատունակ քաղաքացի կա, նրանց համար հավասար պայմաններ են ստեղծվում ԵԱՏՄ անդամ պետություններից որևէ մեկում աշխատանքային գործունեություն իրականացնելու համար:
Այս տարի ԵԱՏՄ հարթակում ստորագրվել է ԵԱՏՄ անդամ պետություններում գիտական աստիճանների մասին փաստաթղթերի փոխադարձ ճանաչման մասին համաձայնագիրը, որի նպատակն է վերացնել աշխատանքային միգրացիայի ոլորտում բացառումները և սահմանափակումները։
Առևտրի նախարարությունից ընդգծել են, որ ԵԱՏՄ-ում հիմնական նպատակներից մեկը աշխատուժի ազատ տեղաշարժի ձևավորումն է։
ԵԱՏՄ-ն միջազգային ինտեգրացիոն տնտեսական միավորում է, որը ստեղծվել է Մաքսային միության և Միասնական տնտեսական տարածքի հիման վրա և գործում է 2015 թվականի հունվարի 1-ից: ԵԱՏՄ անդամներն են Ռուսաստանը, Հայաստանը, Բելառուսը, Ղազախստանը և Ղրղզստանը։