ԵՐԵՎԱՆ, 5 հոկտեմբերի – Sputnik. ՀՅԴ բյուրոն խստորեն դատապարտում է Ադրբեջանի կողմից Արցախի նախկին և ներկա պետական այրերի ձերբակալությունը, որոնց մեջ է նաև Արցախի Հանրապետության Ազգային ժողովի նախագահ, ՀՅԴ Բյուրոյի անդամ Դավիթ Իշխանյանը։ Տեղեկությունը հայտնում է ՀՅԴ բյուրոյի մամուլի ծառայությունը։
«Դավադիր պայմանավորվածությունների ու լուռ համաձայնությունների պայմաններում Ադրբեջանի հանցավոր ռեժիմը փորձում է Արցախի Հանրապետության կազմալուծման և արցախահայության հայրենազրկման գործընթացն անշրջելի դարձնել։ Այս համատեքստում Արցախի Հանրապետության գործող և նախկին քաղաքական և ռազմական ղեկավարության մի շարք ղեկավարների գերեվարումը և կեղծ մեղադրանքներով կալանավորումը հերթական աղաղակող ապօրինությունն է և հեռու գնացող նպատակներ ունի»,–նշված է հաղորդագրության մեջ։
Ընդգծվում է, որ այդ հարցը ոչ միայն քաղաքական, այլև ազգային նշանակություն ունեցող և արժանապատվության հարց է։ Իսկ իրավական գործիքակազմերը կարևոր, բայց բավարար չեն գերեվարված գործիչների ազատման համար։
ՀՅԴ բյուրոն գտնում է, որ առաջին հերթին Հայաստանի Հանրապետության պատկան մարմինները, ամբողջ աշխարհի ազդեցիկ հայկական շրջանակները պետք է գործադրեն քաղաքական և դիվանագիտական բոլոր հնարավորությունները՝ Ադրբեջանի վրա ճնշում բանեցնելու համար։
«Ալիևյան վարչակարգի հանցավոր գործունեությունը, ուժի կիրառման սպառնալիքով էթնիկ զտումների ցեղասպան քաղաքականությունը չի կարող և չպետք է անհետևանք ու անպատիժ մնա»,–նշված է հաղորդագրության մեջ։
Հիշեցնենք` ադրբեջանցի սահմանապահները ձերբակալել են Արցախի նախկին պետնախարար, բարերար Ռուբեն Վարդանյանին, ՊԲ նախկին հրամանատար Լևոն Մնացականյանին, ՊԲ հրամանատարի նախկին տեղակալ Դավիթ Մանուկյանին, Արցախի նախկին արտգործնախարար Դավիթ Բաբայանին, ԼՂ ԱԺ նախագահ Դավիթ Իշխանյանին, Արցախի նախկին նախագահներ Արկադի Ղուկասյանին, Բակո Սահակյանին և Արայիկ Հարությունյանին։