ԵՐԵՎԱՆ, 5 հոկտեմբերի – Sputnik. Արցախի նախկին նախագահ Արայիկ Հարությունյանին սպառնում է ցմահ ազատազրկում։ Այս մասին հայտնել են Ադրբեջանի գլխավոր դատախազությունը և պետական անվտանգության ծառայությունը, հաղորդում է ՌԻԱ Նովոստին։
«Հետաքննության ընթացքում հիմնավոր կասկածներ են ի հայտ եկել, որ Արայիկ Հարությունյանը մասնակցել է նվաճողական պատերազմին որպես Ադրբեջանի տարածքում «ֆիկտիվ ԼՂՀ-ի նախագահ»»,– նշված է հաղորդագրությունում։
Հոկտեմբերի 3–ին հայտնի դարձավ, որ Ադրբեջանի պետական անվտանգության ծառայության աշխատակիցները ձերբակալել են Արցախի նախկին նախագահ Արայիկ Հարությունյանին։
Ադրբեջանի գլխավոր դատախազությունն Արայիկ Հարությունյանին մեղադրանք է առաջադրել Ադրբեջանի քրեական օրենսգրքի տասնյակից ավել հոդվածներով։
Ըստ մեղադրանքի` Հարությունյանը «մտացածին Լեռնային Ղարաբաղի նախագահի պաշտոնում» մասնակցել է «նվաճողական պատերազմին», «հանցավոր հրամաններ է տվել զինված հակամարտության ժամանակ»։
Հարությունյանը կասկածվում է «ահաբեկչական հարձակումների նպատակով բազմաթիվ հանցագործություններ կատարելու», «Ադրբեջանի տարածքներն ականապատելու», «բալիստիկ և այլ տեսակի հրթիռներով Գյանջա (Գանձակ) քաղաքի և քաղաքացիական օբյեկտների վրա հարձակումներ կազմակերպելու մեջ:
Հիշեցնենք` ադրբեջանցի սահմանապահները ձերբակալել են նաև Արցախի նախկին պետնախարար, բարերար Ռուբեն Վարդանյանին, ՊԲ նախկին հրամանատար Լևոն Մնացականյանին, ՊԲ հրամանատարի նախկին տեղակալ Դավիթ Մանուկյանին, Արցախի նախկին արտգործնախարար Դավիթ Բաբայանին, ԼՂ ԱԺ նախագահ Դավիթ Իշխանյանին, Արցախի նախկին նախագահներ Արկադի Ղուկասյանին, Բակո Սահակյանին։