ԵՐԵՎԱՆ, 5 հոկտեմբերի - Sputnik. 2023 թվականի հունվար-սեպտեմբեր ամիսների ընթացքում պետական բյուջե է վերականգնվել ընդհանուր առմամբ 22 մլրդ 791 մլն 203 հազար 116 դրամ։ Տեղեկությունը հայտնում է ՀՀ գլխավոր դատախազության մամուլի ծառայությունը։
Այս գումարները վերականգնվել են դատախազների հսկողությամբ քննվող ընթացիկ և ավարտված քրեական վարույթներով։
«2023 թվականի 1-ին կիսամյակում վերականգնվել է 10 մլրդ 494 մլն 294 հազար 242 դրամ, իսկ 2023 թվականի հուլիս-սեպտեմբեր ամիսներին՝ 12 մլրդ 296 մլն 908 հազար 874 դրամ: Այլ խոսքով՝ 2023 թվականի հուլիս-սեպտեմբեր ամիսներին պետությանը պատճառված վնասի վերականգնման չափը շուրջ 2 մլրդ դրամով գերազանցել է 2023 թվականի առաջին կիսամյակի ցուցանիշը»,– ասված է հաղորդագրությունում:
Նշվում է, որ 2022 թվականի ընթացքում էլ ավարտված քրեական վարույթներով վերականգնվել է պետությանը պատճառված վնասից 2 մլրդ 279 մլն 263 հազար 913 դրամ, 2021 թվականին՝ 5 մլրդ 584 մլն 138 հազար 366 դրամ, իսկ 2020 թվականին՝ 1 մլրդ 989 մլն 200 հազար 408 դրամ:
Այսինքն, միայն 2023 թվականի 9 ամսվա ընթացքում ավարտված քրեական վարույթներով պետությանը պատճառված վնասի վերականգնման չափը` 10 մլրդ 568 մլն 14 հազար 402 դրամ, գերազանցում է 2020, 2021 և 2022 թվականների հանրագումարի ցուցանիշը (9 մլրդ 852 մլն 602 հազար 687 դրամ):