ԵՐԵՎԱՆ, 4 հոկտեմբերի – Sputnik. «Ղարաբաղ Տելեկոմի» բջջային կապի 097 կոդով բոլոր հեռախոսահամարներն անցել են Հայաստանի Հանրապետությունում գործող Team Telecom օպերատորի ցանց: Այս մասին որոշումը կայացվել է ՀՀ հանրային ծառայությունները կարգավորող հանձնաժողովի նիստում:
«Թիմ» ընկերությունն ընտրվել է այն պատճառով, քանի որ ավելի վաղ «Ղարաբաղ Տելեկոմը» նրա հետ կնքել էր տեխնիկական համագործակցության համաձայնագիր։ Հետևաբար «Թիմն» ունի այս SIM քարտերի անվտանգության ծածկագրերը և անհրաժեշտ այլ տեխնիկական պայմաններ այդ քարտերն իր ցանցում ներառելու համար:
Ինչպես Sputnik Արմենիային պարզաբանեցին ՀԾԿՀ–ից, եթե 097 կոդով բաժանորդների մի մասը կապի հետ կապված դժվարություններ ունի, հնարավոր պատճառներից մեկը կարող են լինել նախորդ սերնդի SIM քարտերը, որոնք «Թիմի» սպասարկման գրասենյակներում կարելի է փոխանակել նորերով։ Բացի այդ, այս բաժանորդները չեն սահմանափակվի «Թիմի» ցանցով. Հայաստանում գործող բջջային հեռախոսահամարների` ցանկացած այլ ցանց տեղափոխելու ծառայությունը (Mobile Number Portability) տարածվում է նաև 097 կոդով հեռախոսահամարների վրա:
Այսպիսով, «Թիմ» ընկերությունը 097 կոդով նոր համարներ չի տրամադրի և կսպասարկի միայն արդեն գործող համարները (որոնց թիվը կազմում է մոտ 234 հազար):
Այս թիվը պայմանավորված է նրանով, որ Արցախի բնակիչների մի մասը կարող էր ունենալ մեկից ավելի հեռախոսահամար, և ՀՀ բնակիչների մի մասը ևս ունի արցախյան հեռախոսահամար՝ հարազատներին կամ աշխատանքի համար զանգահարելու համար։