ԵՐԵՎԱՆ, 4 հոկտեմբերի – Sputnik. Այս պահին Լեռնային Ղարաբաղից բռնի տեղահանված 100 632 անձանցից Հայաստանում հաշվառվել է 98.216 անձ։ Այսօրվա ճեպազրույցի ժամանակ վերջին տվյալները ներկայացրեց ՀՀ վարչապետի մամուլի քարտուղար Նազելի Բաղդասարյանը։
Նա տեղեկացրեց, որ բռնի տեղահանվածների թվի փոփոխություն չկա, փոխարենը Հայաստան ժամանածների շուրջ 98 տոկոսը հաշվառվել է։
Նրա խոսքով` աշխատանքի և սոցիալական հարցերի նախարարությունը 59.300 հայտ է ստացել բռնի տեղահանված անձանցից, որտեղ նշվում են նրանց առաջնային կարիքները։
Բացի այդ` այսօրվա դրությամբ առողջապահության առաջնային կազմակերպություններում կցագրվել է շուրջ 8000 անձ։
Ինչ վերաբերում է բռնի տեղահանված երեխաների ուսման գործընթացին, արդեն շուրջ 6104 աշակերտ ընդգրկվել է ՀՀ դպրոցներում։
Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական ագրեսիայի հետևանքով Արցախը մեկ օրում առնվազն 200 զոհ և ավելի քան 400 վիրավոր տվեց։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը։