ԵՐԵՎԱՆ, 3 հոկտեմբեր – Sputnik. Միջազգային գործընկերները ՀՀ–ից չեն պահանջել դուրս գալ ՀԱՊԿ–ից։ Ֆրանսիայի ԱԳ նախարար Կատրին Կոլոննայի հետ ասուլիսի ժամանակ այս հայտարարությունն արեց ՀՀ արտգործնախարար Արարատ Միրզոյանը` պատասխանելով լրագրողի հարցին, թե արդյոք Ֆրանսիայի համար կարևոր է ՀԱՊԿ-ի հետ փոխգործակցության դադարեցումը հայ-ֆրանսիական ռազմական համագործակցության հաստատման համար:
Ավելի վաղ Կատրին Կոլոննան հայտնել էր, որ Ֆրանսիան իր համաձայնությունն է տվել ապագա պայմանագրի կնքման համար, որը ՀՀ–ին ռազմական տեխնիկա տրամադրելու հնարավորություն կտա։
«Խոսքը Հայաստանի պաշտպանական ներուժին աջակցելու մասին է։ Կարող եմ հավաստիացնել, որ մեր գործընկերները երբեք մեր առաջ նման պահանջ չեն դրել», - ասաց Միրզոյանը։
Նշենք, որ ՀԱՊԿ–ի հետ համագործակցության հնարավոր դադարեցման մասին հարցը նախապես տրվել էր Ֆրանսիայի ԱԳ նախարարին, սակայն նա հարցը փոխանցեց Արարատ Միրզոյանին` հավելելով, որ Երևանն ու Փարիզն արդեն մի շարք հարցեր են համաձայնեցրել։
Հիշեցնենք սեպտեմբերի 24–ին ժողովրդին ուղղված իր ուղերձում ՀՀ վարչապետՆիկոլ Փաշինյանը հայտարարեց հանրապետության արտաքին և ներքին անվտանգության գործիքները փոխելու և լրացնելու անհրաժեշտության մասին։ Նա նշեց, որ Ադրբեջանի հարձակումները ՀՀ–ի վրա հանգեցնում են նրան, որ արտաքին անվտանգության համակարգերը, որում երկար տարիներ ներգրավված է եղել երկիրը, անարդյունավետ են պետական շահերի և անվտանգության համար։
Ավելի ուշ ՌԴ ԱԳՆ–ն հանդես եկավ հայտարարությամբ` Փաշինյանի ուղերձում հնչած պնդումները որակելով որպես ՌԴ–ի հասցեին ուղղված անընդունելի ելույթ։ Ռուսական կողմի կարծիքով` ակնհայտ է, որ փորձ է արվում վերացնել ներքին ու արտաքին քաղաքականության մեջ ձախողումների պատասխանատվությունը՝ մեղքը բարդելով Մոսկվայի վրա։