ԵՐԵՎԱՆ, 3 հոկտեմբերի – Sputnik. ՀՀ իշխանությունները փակել են իրենց աչքերը Լեռնային Ղարաբաղում տեղի ունեցող ողբերգության վրա, իսկ հիմա մեղավորներ են փնտրում։ Այս մասին լրագրողների հետ զրույցում հայտարարեց «Հայաստան» խմբակցության պատգամավոր Արթուր Խաչատրյանը։
ՀՀ ղեկավարությունը փորձում է հայտարարել, որ Ադրբեջանը հարձակվեց ԼՂ–ի վրա, քանի որ այնտեղ իշխանափոխություն տեղի ունեցավ։ Ըստ պատգամավորի` իրականում այդ ամենը տեղի ունեցավ այն բանից հետո, երբ ՀՀ վարչապետ Նիկոլ Փաշինյանը ճանաչեց Լեռնային Ղարաբաղն Ադրբեջանի կազմում։
«ՀՀ օրենսդրությունը պետության ղեկավարին դրա իրավունքը չի տալիս, իսկ Արցախի օրենսդրությունը ՀՀ կառավարությանը նման լիազորություն չի տալիս։ Փաշինյանի այդ հայտարարությունից հետո Ադրբեջանը շրջափակեց Արցախը, իսկ դրանից հետո այդ ամենը վերածվեց պաշարման։ Այն ժամանակ, երբ Արցախի նկատմամբ հարձակում եղավ, պաշտպանության նախարարությունը ցինիկաբար հայտարարում էր, որ մեր սահմաններին ամեն ինչ լավ է։ ՀՀ–ն Պիղատոսի նման իր ձեռքերը լվաց, փակեց աչքերը և ականջները, դռներն ու պատուհանները, որ չտեսնի` ինչպես են կոտորում հայերին Արցախում»,– նշեց Խաչատրյանը։
Մեկնաբանելով այն, որ սեպտեմբերին Արցախում իշխանության եկան Դաշնակցության ներկայացուցիչները, պատգամավորը հայտարարեց` Արցախի նախագահ Արայիկ Հարությունյանը կամավոր է հրաժարական տվել, ժողովուրդն էլ նոր ղեկավարություն ձևավորեց։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական ագրեսիայի հետևանքով Արցախը մեկ օրում առնվազն 200 զոհ և ավելի քան 400 վիրավոր տվեց։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։