ԵՐԵՎԱՆ, 29 սեպտեմբերի – Sputnik. Թուրքիայի պաշտպանության նախարար Յաշար Գյուլերն ասել է, որ Հայաստանը պետք է բացի այսպես կոչված «Զանգեզուրի միջանցքը», որը պետք է կապի Ադրբեջանը Նախիջևանի և Թուրքիայի հետ։
«Հայաստանի կողմից իր խոստումների կատարումը, հատկապես «Զանգեզուրի միջանցքի» բացումը և այդ արդյունքի վրա հիմնված բանակցությունների շարունակությունը հանդիսանում են կայունության հաստատման միակ ուղին», - ասել է Գյուլերը Hurriyet թերթին տված հարցազրույցում։
Պաշտոնյայի խոսքով` Լեռնային Ղարաբաղում 44-օրյա պատերազմի արդյունքներով ստորագրվել է հրադադարի համաձայնագիր, սակայն հետագայում «Հայաստանը չի կատարել անհրաժեշտ պայմանները»։
Թուրք նախարարն ասել է, որ Անկարան ուշադրությամբ հետևում է բանակցություններին, որոնք կողմերը կանցկացնեն Իսպանիայում առաջիկա օրերին։ Միաժամանակ նա հավելել է, որ Թուրքիան, ինչպես միշտ, աջակցում է եղբայրական Ադրբեջանին «մեկ ժողովուրդ, երկու պետություն» տրամաբանությամբ։
Ինչպես արդեն հայտնել ենք, հոկտեմբերի 5-ին Գրանադայում նախատեսված է Հայաստանի վարչապետի և Ադրբեջանի նախագահի հանդիպումը ԵՄ միջնորդությամբ։
Հիշեցնենք, որ 2021 թվականին Ադրբեջանի նախագահ Իլհամ Ալիևը հայտարարեց Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին փոխանցեց հարաբերությունների կարգավորման վերաբերյալ հինգ կետից բաղկացած իր առաջարկը: Հայկական կողմը շտկումներ ավելացրեց և ուղարկեց իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։
Հայաստանի, Ռուսաստանի ու Ադրբեջանի արտգործնախարարների մակարդակով վերջին հանդիպումը կայացել է հուլիսի 25–ին Մոսկվայում։