ԵՐԵՎԱՆ, 29 սեպտեմբերի – Sputnik. ՀՀ կենտրոնական ընտրական հանձնաժողովըհաստատել է քաղաքացիական նախաձեռնության («ՀայաՔվե». խմբ.) ներկայացրած ստորագրությունների վավերականությունը։ Տեղեկությունը հրապարակվել է ԿԸՀ–ի կայքում։
Թե ինչու չեն նշել` որ նախաձեռնության մասին է խոսքը, ԿԸՀ մամուլի ծառայությունից Sputnik Արմենիային պարզաբանեցին, որ իրենք պաշտոնապես ստացել են «66 անդամ ունեցող նախաձեռնության դիմում», որտեղ կոնկրետ անուն չի նշվել։
Ավելի վաղ հայտնել էինք, որ հունիսի 20–ին ԿԸՀ-ն գրանցել է նախաձեռնության դիմումը՝ ՀՀ քրեական օրենսգրքում լրացում կատարելու մասին նախագիծը (հարցը) քաղաքացիական նախաձեռնության կարգով առաջարկելու նպատակով նախաձեռնող խումբ կազմավորելու վերաբերյալ։ Նախաձեռնող խումբը ստորագրությունների հավաքման համար ուներ 60 օր՝ հունիսի 21–ից օգոստոսի 19–ը ներառյալ, բայց «ՀայաՔվեի» ստորագրահավաքն ավարտվեց օգոստոսի 5–ին, քանի որ արդեն իսկ հավաքվել էր 58 հազար ստորագրություն։
Քաղաքացիական նախաձեռնության ներկայացուցիչները օգոստոսի 31–ին ստորագրությունների լրացված ձևաթղթերի 5 տուփ էին ներկայացրել ԿԸՀ։ Հանձնաժողովը մեկ ամիս ժամանակ ուներ՝ ստուգելու ստորագրված ձևաթերթիկները։
«ԿԸՀ–ն օգտագործել է տեխնիկածրագրային միջոցներ, իրականացրել ստորագրությունների վավերականության ստուգում՝ ստորագրած ձևաթերթիկների տվյալները համադրելով պետական և տեղական ինքնակառավարման մարմինների տիրապետման ներքո գտնվող հասանելի տեղեկությունների հետ։ Գործընթացին հետևել են նախաձեռնության ներկայացուցիչները»,– տեղեկացնում են ԿԸՀ–ից։
Հիշեցնենք` «ՀայաՔվե» նախաձեռնության օրենքի նախագիծը խիստ պատիժ է նախատեսում Լեռնային Ղարաբաղի ինքնորոշումից հրաժարվելու և Հայոց ցեղասպանության նշանակությունը նսեմացնելու համար: Այն ԱԺ-ում պետք է ընդունվի պատգամավորների ձայների մեծամասնությամբ: