ԵՐԵՎԱՆ, 29 սեպտեմբերի – Sputnik. Հայաստանի Հանրապետության հիվանդանոցներում Լեռնային Ղարաբաղից տեղահանված ավելի քան 70 քաղաքացիական անձ բուժում է ստանում։ Այս մասին լրագրողների հետ զրույցում ասաց Գորիսում գտնվող ՀՀ առողջապահության նախարար Անահիտ Ավանեսյանը։
«Նրանց թիվը փոփոխվում է, նրանք 60-70-ից ավելին են և սա միայն քաղաքացիական բնակչության շրջանում եղած անձինք են։ Նրանք ունեն սրտանոթային և մի շարք այլ հիվանդություններ»,– նշեց Ավանեսյանը։
Նա շեշտեց, որ Գորիսի և Վայքի հաշվառման կետերում, այդ գործընթացից հետո գնահատվում են մարդկանց առաջնային կարիքները, որից հետո էլ, եթե հասկանում են, որ հոսպիտալացման կարիք կա, ապա շտապօգնության մեքենաները տեղափոխում են հիվանդանոցներ։
Նախարարն ընդգծեց` առավոտյան եղել է Գորիս ԲԿ–ում և այնտեղ, եթե առաջնակի հետազոտությունների կարիք է լինում, ապա բուժառուները տեղափոխվում են Երևանի բուժհաստատություններ։ Հաշվառման կետերի մոտ, մարդկանց անհրաժեշտության դեպքում դեղորայք է տրամադրվում, անգամ շաքարային դիաբետով հիվանդ անձանց, կարիքի դեպքում, ինսուլին են բաժանում։
«Հիմա շատ կարևոր է, որպեսզի մեր հայրենակիցներն իրենց տեղակայման վայրերում դիմեն պոլիկլինիկաներ, կցագրվեն և այնտեղ ստանան իրենց բժշկական ծառայությունները»,– ասաց Ավանեսյանը։
Հիշեցնենք, որ սեպտեմբերի 28-ի դրությամբ Արցախի բուժհաստատություններից Հայաստան տեղափոխվել է 349 բուժառու և նրանց մեծ մասը ծանր և ծայրահեղ ծանր վիճակում են։ Երեկ, ժամը 11։00-ի դրությամբ 7 մահ է գրանցվել, մահացածներից 6-ը Ստեփանակերտի մոտակայքում վառելիքի պահեստում տեղի ունեցած պայթյունի հետևանքով տուժածներն էին։
Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական զինուժը շփման գծի ողջ երկայնքով խախտեց հրադադարը` հասցնելով հրթիռահրետանային հարվածներ։ Ադրբեջանական ագրեսիայի հետևանքով առնվազն 200 զոհ և ավելի քան 400 վիրավոր կա։
Սեպտեմբերի 29-ի ժամը 06:00-ի դրությամբ Հայաստան է տեղափոխվել Լեռնային Ղարաբաղից բռնի տեղահանված 88 780 անձ: