ԵՐԵՎԱՆ, 29 սեպտեմբերի – Sputnik. ՀՀ Ազգային ժողովի նախկին նախագահ, առողջապահության նախկին նախարար, «Արաբկիր» բժշկական կենտրոնի գիտական և կառավարման խորհրդի ղեկավար Արա Բաբլոյանը հուսով է, որ Ադրբեջանի նախագահ Իլհամ Ալիևը համաներում կհայտարարի բոլոր արցախցիների նկատմամբ։ Նա այդ մասին գրել է Ալիևին ուղված բաց նամակում, որը հրապարակվել է «Արաբկիր» բժշկական համալիրի ֆեյսբուքյան էջում։
«Ես թույլ եմ տալիս ինձ գրել այս բաց նամակը` հաշվի առնելով մի քանի հանգամանք. որպես մանկական վիրաբույժ ես վիրահատել և փրկել եմ հազարավոր երեխաների, նրանց մեջ և հարյուրավոր ադրբեջանցի երեխաների կյանքեր, երբ մենք բոլորս նույն երկրի քաղաքացիներ էինք, որպես ՀՀ առողջապահության նախարար արել եմ հնարավոր ամեն ինչ մեր տարածաշրջանում, այդ թվում` Ադրբեջանում կարմրուկի բռնկումը կանխարգելելու համար` առաջարկելով Ադրբեջանի առողջապահության նախարարին կարմրուկի պատվաստանյութի անհրաժեշտ խմբաքանակ, որպես ՀՀ Ազգային ժողովի նախագահ ես հանդես եմ եկել հայտարարությամբ` նշելով, որ ինձ համար անընդունելի է 18-20 տարեկան երիտասարդների զոհվելը թե՛ հայկական և թե՛ ադրբեջանական կողմից` միայն այն պատճառով, որ մենք չենք կարողանում խաղաղ քաղաքական ճանապարհով հարցերին լուծումներ տալ»,– նշել է Բաբլոյանը:
Նա ընդգծել է, որ իր նամակով ցանկանում է Ալիևին հիշեցնել իր խոստման մասին և ասել, որ պարտավոր է այն պահել թե՛ որպես երկրի նախագահ, թե՛ որպես տղամարդ:
«Դուք պայման էիք դրել Լեռնային Ղարաբաղի հայերի առջև, որ վայր դնեն զենքն ու լուծարեն պետական կառույցները` փոխարենը խոստանալով համաներում բոլորի համար, ինչը ոգևորված ողջունել էին աշխարհի առաջատար մի շարք պետությունների ղեկավարներ»,– գրել է ԱԺ նախկին նախագահը:
Նրա խոսքով` հիմա, երբ մարդիկ վայր են դրել զենքը` կանխելով երկկողմանի բազմաթիվ նոր զոհեր, Լեռնային Ղարաբաղի նախագահը հրամանագրով հայտարարել է պետության լուծարումը, Լեռնային Ղարաբաղից դուրս է եկել մոտ 100 000 հայ բնակիչ, և շուտով այդ հողատարածքը կհանձնվի Ադրբեջանին, Ալիևը, ցավալիորեն, չի հայտատարում համաներում:
«Ես հույս ունեմ, որ իմ այս նամակը Ձեր մեջ կարթնացնի արժանապատվություն, և որպես խոստում տված նախագահ` կհայտարարեք համաներում հիմա, առանց նախապայմանների և ոչ թե ավելի ուշ` գերեվարումների նոր դեպքերից, նոր նսեմացումներից հետո»,– եզրափակել է Բաբլոյանը։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական ագրեսիայի հետևանքով Արցախը մեկ օրում առնվազն 200 զոհ և ավելի քան 400 վիրավոր տվեց։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Սեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը, նրանք զանգվածաբար լքում են իրենց բնակավայրերը և տեղափոխվում Հայաստան։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։