ԵՐԵՎԱՆ, 28 սեպտեմբերի – Sputnik.Երևանի նախկին քաղաքապետ, «Ազգային առաջընթաց» կուսակցության քաղաքապետի թեկնածու Հայկ Մարությանը ֆեյսբուքյան ուղիղ եթերում հայտարարեց, որ իրենց խմբակցությունը գնում է Երևանի ավագանու նոր ընտրությունների։
Բանն այն է, որ այսօր Կենտրոնական ընտրական հանձնաժողովը նիստ է գումարել , որտեղ հաստատվել է Երևանի ավագնու կազմը։ Բոլոր նրանք, ովքեր այսօր իրենց մանդատները վայր չեն դրել, մինչև հոկտեմբերի 10–ին կայանալիք ավագանու առաջին նիստը դա անել չեն կարող։
Մարությանը նշեց, որ իրենք բոյկոտելու են Երևանի ավագանու անդրանիկ նիստը, քանի որ ընդդիմադիր ուժերի ձայները չեն բավականացնում ընդդիմադիր քաղաքապետ ընտրելու համար։ Փաստացի «Հանրային ձայն» կուսակցություն առաջին և երկրորդ համարներ Արտակ Գալստյանը և Տիգրան Ուրիխանյանը ֆիզիկապես չեն կարող նիստին ներկա գտնվել, քանի որ Արտակ Գալստյանը կալանավորված է, իսկ Տիգրան Ուրիխանյանը հետախուզման մեջ է։
«Սա նշանակում է, որ ընդդիմադիր քաղաքապետ ընտրելու համար պահանջվող 33 ձայնից երկուսն այլևս չկա։ Մեր ֆրակցիան հայտարարում է, որ մենք գնում ենք նոր ընտրությունների»,–ասաց Մարությանը։
Նա հայտարարեց, որ իրենք ներկա չեն գտնվելու առաջին նիստին և հույս հայտնեց, որ «Հանրային ձայն» կուսակցության ոչ մի անդամ նիստին չի գնա, հակառակ դեպքում քվորում կլինի և եթե անգամ իրենք դեմ քվեարկեն, իշխանությունը կվերարտադրվի։
Հայտնել էինք, «Մայր Հայաստան» դաշինքը ևս կբոյկոտի ու չի մասնակցի ավագանու առաջին նիստին։
Հիշեցնենք` Երևանում սեպտեմբերի 17–ին ավագանու ընտրություններ էին, որին մասնակցեց 13 կուսակցություն և 1 դաշինք։ Երևանի 12 վարչական շրջաններում գործել են 475 ընտրական տեղամասեր։
Քաղաքական ուժերից որևէ մեկին չհաջողվեց 50+ տոկոս քվե հավաքել, բայց նրանցից 5–ը, այնուամենայնիվ, հաղթահարեցին անցողիկ շեմը`
1.
«Հանրային ձայն» կուսակցություն (Արտակ Գալստյան),2.
«Ազգային առաջընթաց» կուսակցության (Հայկ Մարության),3.
«Հաղթանակ» կուսակցություն (Արտակ Զեյնալյան),4.
«Քաղաքացիական պայմանագիր» կուսակցություն (Տիգրան Ավինյան)5.
«Մայր Հայաստան» դաշինք (Անդրանիկ Թևանյան)։