ԵՐԵՎԱՆ, 28 սեպտեմբերի – Sputnik. ՀՀ կառավարությունը հաստատեց համաձայնագիրը, որով կմշտադիտարկվի ԱՊՀ ռադիացիոն իրավիճակը։ Որոշումն ընդունվեց ՀՀ կառավարության այսօրվա նիստում։
«Ռադիացիոն իրավիճակի մշտադիտարկման տվյալներ փոխանակելիս ԱՊՀ մասնակից պետությունների փոխգործակցության մասին» համաձայնագիրը ՀՀ կառավարությունը ստորագրել էր 2023 թ. հունիսի 8–ին Սոչիում։
Համաձայնագրի շրջանակում ԱՊՀ տարածքում կստեղծվի ռադիացիոն իրավիճակի մշտադիտարկման միասնական տեղեկատվական հարթակ։
«Հարթակը նախատեսված է ԱՊՀ մասնակից պետությունների տարածքում ռադիացիոն իրավիճակի, դրա փոփոխության վերաբերյալ տվյալների և տեղեկատվության, ինչպես նաև ԱՊՀ տարածք՝ այդ թվում երրորդ պետությունների տարածքներից, միջսահմանային ռադիոակտիվ աղտոտման կամ դրա վտանգի դեպքում տվյալների փոխանակման համար»,– ասված է նախագծի հիմնավորման մեջ:
Նշվում է, որ համաձայնագրով կապահովվի միջուկային և ճառագայթային անվտանգությունը, կկանխվի միջուկային և ռադիոակտիվ նյութերի անօրինական տարածումը։
Համաձայնագրի կողմերը պարտավորվում են ապահովել փոխանցվող տեղեկատվության հավաստիությունը, ինչպես նաև ստացված տեղեկատվությունն օգտագործել բացառապես նշյալ համաձայնագրի նպատակներով: