ԵՐԵՎԱՆ, 28 սեպտեմբերի – Sputnik. Այսօր ժամը 20։00–ի դրությամբ Արցախից բռնի տեղահանված 76.407 մարդ է ժամանել Հայաստան։ Ասուլիսի ժամանակ այս տեղեկությունը հայտնեց ՀՀ վարչապետի մամուլի խոսնակ Նազելի Բաղդասարյանը։
«Ժամը 18–ի դրությամբ Հակարիի կամուրջը հատել է 15 հազար 535 տրանսպորտային միջոց։ Հաշվառում անցել է 55 248 անձ»,–ասաց նա։
Բաղդասարյանի խոսքով` 17153 անձ օգտվել է պետության կողմից տրամադրված կացարաններից։
«Արագածոտնի մարզում տեղաբաշխվել է 988 անձ, Արարատի մարզում` 3665 անձ, Արմավիրի մարզում` 1231, Գեղարքունիքում` 1542, Լոռու մարզում` 663, Կոտայքում` 4156, Շիրակում` 783, Սյունիքում` 1958, Վայոց Ձորում` 1071, Տավուշում` 797 անձ»,–ասաց նա։
Իր հերթին ՆԳՆ Միգրացիայի և քաղաքացիության ծառայության պետ Արմեն Ղազարյանը հայտնեց, որ հաշվառում են նաև այն քաղաքացիներին, որոնք ինչ–ինչ պատճառներով չունեն փաստաթուղթ։
«Քաղաքացիների նույնականացումն իրականացվում է պետռեգիստրի միջոցով։ Շատ էական է, որպեսզի անձինք անցնեն հաշվառում, որպեսզի հետագա փաստաթղթավորման խնդիրները լուծվեն, և դրանք վերականգնվեն»,–ասաց նա։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական ագրեսիայի հետևանքով Արցախը մեկ օրում առնվազն 200 զոհ և ավելի քան 400 վիրավոր տվեց։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Սեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, ապա սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։