ԵՐԵՎԱՆ, 26 սեպտեմբերի – Sputnik. Գերմանիայի Դաշնության Հանրապետության արտգործնախարար Աննալենա Բերբոկն այսօր հայտարարել է, որ հնարավորինս արագ պետք է միջազգային դիտորդական առաքելություն ուղարկել ԼՂ, ինչպես նաև հորդորել է Ադրբեջանին թույլ տալ նրանց մուտքը։
«Ամենակարևորը հիմա թափանցիկությունն է, ինչպես նաև միջազգային հանրության աչքերն ու ականջները տեղում լինեն։ Մեր գործընկերների հետ ջանքեր կգործադրենք դիտորդներին արագ ուղարկելու համար։ Վստահությունն առ այն, որ Ադրբեջանը լուրջ է վերաբերվում ԼՂ ժողովրդի անվտանգության և բարեկեցության ապահովման իր պարտավորություններին, կապացուցվեր միջազգային դիտորդների մուտքի թույլտվությամբ», – ասվում է ԳԴՀ ԱԳՆ կայքում հրապարակված Բերբոկի հայտարարության մեջ։
Նրա խոսքով` ԼՂ–ում դեռ առաջին անհրաժեշտության ապրանքների սուր պակաս է զգացվում։
«Ես որոշեցի ևս մեկ անգամ զգալի ավելացնել մեր մարդասիրական օգնությունն ու լրացուցիչ 2-ից մինչև 5 մլն եվրո բարձրացնել Կարմիր Խաչի Միջազգային Կոմիտեի մեր ֆինանսավորումը», – հավելել է Բերբոկը։
Ավելի վաղ Ֆրանսիայի կառավարությունը 7 մլն եվրո էր հատկացրել ԼՂ–ից բռնի տեղահանվածների սոցիալական կարիքների համար։
Նշենք, որ ադրբեջանական ագրեսիայից հետո Լեռնային Ղարաբաղի բնակչությունը ստիպված է եղել լքել իրենց տները։ Ներքին տեղահանվածներին նախ գրանցում են Կոռնիձորում, այնուհետև ուղարկում Գորիսի և Վայքի ընդունարաններ: Այնտեղ գրանցվում են նրանց կարիքները և առաջարկվում է ժամանակավոր կացարան։
Կառավարության վերջին տվյալներով՝ ԼՂ-ից ՀՀ է եկել 28 120 մարդ։