Երբ հայտնի դարձավ, որ Լաչինի միջանցքը բաց է Արցախի հայերի համար, մարդիկ սկսեցին հապճեպ դուրս գալ` ով ինչպես կարող էր։ Կային մարդիկ, որոնց ուղղակի որպես «բեռ» տեղավորել են ԶԻԼ մակնիշի մեքենաների մեջ ու տեղափոխել Հայաստան։ Ինչ-որ մեկն էլ հասել է ՀՀ տնային շորերով, իսկ ինչ–որ մեկի «բախտն» ավելի էր բերել ու հասցրել էր հավաքել իրերը:
Այստեղ էր նաև մի աղջիկ, որը հասցրել է իր հետ վերցնել սիրելի տիկնիկը։ Այստեղ էր նաև մի տղամարդ, որը Լաչինի միջանցքի շրջափակումից ի վեր` ինն ամսվա ընթացքում առաջին անգամ էր տեսել ու գրկել իր երեխաներին։ 2022 թվականի դեկտեմբերին Հայաստան մեկնելուց հետո նա այլևս չի կարողացել տուն վերադառնալ։