ԵՐԵՎԱՆ, 27 սեպտեմբերի – Sputnik. Արցախից տեղահանված ուսուցիչների համար հաջորդ շաբաթվանից վերապատրաստման դասընթացներ կմեկնարկեն։ Այսօրվա ասուլիսի ժամանակ տեղեկությունը հայտնեց ՀՀ կրթության, գիտության, մշակույթի և սպորտի նախարար Ժաննա Անդրեասյանը։
«Այսպիսով ցանկանում ենք աջակցել նրանց, որպեսզի ստեղծված իրավիճակում նաև համապատասխան միջավայր ձևավորվի երեխաների համար»,– նշեց նախարարը։
Նա ընդգծեց, որ դպրոցներ դիմելիս որևէ փաստաթղթային խոչընդոտ չի լինի, և աշակերտներն առանց որևէ փաստաթղթի կընդունվեն դպրոց:
ՀՀ տարածքում գործում են նաև տարածքային մանկավարժահոգեբանական կենտրոններ։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական զինուժը շփման գծի ողջ երկայնքով խախտեց հրադադարը` հասցնելով հրթիռահրետանային հարվածներ։ Ադրբեջանական ագրեսիայի հետևանքով առնվազն 200 զոհ և ավելի քան 400 վիրավոր կա։
Սեպտեմբերի 20–ին հայտնի դարձավ, որ Արցախի իշխանություններն ընդունել են ՌԴ խաղաղապահ առաքելության զորակազմի հրամանատարության՝ կրակի դադարեցման վերաբերյալ առաջարկությունը: Սեպտեմբերի 21–ին ՌԴ խաղաղապահների միջնորդությամբ ադրբեջանական Եվլախում կայացավ Արցախի ու Ադրբեջանի ներկայացուցիչների առաջին հանդիպումը, 2–րդը` սեպտեմբերի 25–ին Իվանյանում։
Նշենք, որ վերջին տվյալների համաձայն` Արցախից բռնի տեղահանվել և Հայաստան է տեղափոխվել 50 243 անձ։