ԵՐԵՎԱՆ, 26 սեպտեմբերի – Sputnik. Ստեփանակերտ-Կոռնիձոր ճանապարհի գերծանրաբեռնվածության պատճառով բարդացել է Արցախից Հայաստանի Հանրապետություն մեր հայրենակիցների տեղափոխումը։ Այս մասին ֆեյսբուքյան իր էջում հայտնում է Արցախի ԱԻ պետական ծառայության մամուլի խոսնակ Հունան Թադևոսյանը։
Նրա խոսքով` մարդիկ օրերով մնում են ճանապարհին, շատ դեպքում նրանց հետ կապ հաստատել չի հաջողվում։
«Սիրելի՛ հայրենակիցներ, ավելորդ խնդիրներից, դեպքերից ու պատահարներից խուսափելու համար խնդրում ենք չշտապել։ Խցանումների պատճառով հնարավոր չէ այս պահին իրականացնել տեղափոխումը` անգամ շրջաններից»,– գրում է Թադևոսյանը։
Ստեփանակերտի բնակիչները տեղափոխման հարցով պետք է դիմեն քաղաքապետարան, իսկ շրջանների բնակիչները համապատասխան վարչակազմերին։
Թադևոսյանը դիմում է արցախցիներին` խնդրելով ըմբռնումով մոտենալ։ Շեշտում է` ստեղծված օպերատիվ շտաբն ու ԱԻ պետական ծառայությունը զբաղվում են անհետ կորածների հարցերով, այսինքն` որոնողափրկարարական աշխատանքներով։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական զինուժը շփման գծի ողջ երկայնքով խախտեց հրադադարը` հասցնելով հրթիռահրետանային հարվածներ։
Ադրբեջանի պաշտպանության նախարարությունը հայտարարեց, թե լոկալ բնույթի հակաահաբեկչական միջոցառումներ է անցկացնում։
Ադրբեջանական ագրեսիայի հետևանքով առնվազն 200 զոհ և ավելի քան 400 վիրավոր կա։
Բազմաթիվ բռնի տեղահանված արցախցիներ արդեն 2 օր է տեղափոխվում են ՀՀ։