Կոռնիձորում ենք բռնի տեղահանվածների իրավունքների պաշտպանությունը ստանձնելու համար. ՀՀ ՄԻՊ

ԵՐԵՎԱՆ, 25 սեպտեմբերի – Sputnik. Կոռնիձորի հումանիտար կայանում աշխատում է նաև Հայաստանի մարդու իրավունքների պաշտպանի թիմը` տեղում փաստահավաք աշխատանքներ իրականացնելու, բռնի տեղահանված անձանց իրավունքների պաշտպանության վիճակը ոչ միայն դիտարկելու, այլև պաշտպանության գործընթացը փաստացի ստանձնելու նպատակով։

Նա հավելեց, որ ոչ միայն անընդհատ կապի մեջ են միջազգային գործընկերների հետ, այլև հենց տեղում են նրանց հետ աշխատում։

Նշենք, որ Արցախից տեղահանվածների առաջնային հաշվառումն ու կարիքների գնահատումն իրականացվում է Սյունիքի Կոռնիձոր համայնքի մոտակայքում գտնվող կետում։

Արցախի մարդու իրավունքների պաշտպան Գեղամ Ստեփանյանը Sputnik Արմենիայի հետ զրույցում ասել էր, որ բնակիչների տարհանումն իրականացվում է ըստ առաջնահերթության։ Առաջին փուլում տարհանվում են նրանք, ում բնակավայրերը ռազմական վերջին գործողությունների հետևանքով անցել են Ադրբեջանի վերահսկողության տակ։ Առաջնահերթ ցանկում են Մարտակերտի շրջանի գյուղերը։ Ստեփանակերտի բնակիչների տարհանման մասին դեռ որոշում չկա։

Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական զինուժը շփման գծի ողջ երկայնքով խախտեց հրադադարը` հասցնելով հրթիռահրետանային հարվածներ։ Ադրբեջանի պաշտպանության նախարարությունը հայտարարեց, թե լոկալ բնույթի հակաահաբեկչական միջոցառումներ է անցկացնում։

Ադրբեջանական ագրեսիայի հետևանքով առնվազն 200 զոհ և ավելի քան 400 վիրավոր կա։

Սեպտեմբերի 20–ին հայտնի դարձավ, որ Արցախի իշխանություններն ընդունել են ՌԴ խաղաղապահ առաքելության զորակազմի հրամանատարության՝ կրակի դադարեցման վերաբերյալ առաջարկությունը: Սեպտեմբերի 21–ին ՌԴ խաղաղապահների միջնորդությամբ ադրբեջանական Եվլախում կայացավ Արցախի ու Ադրբեջանի ներկայացուցիչների հանդիպումը։ Այսօր Իվանյանում մեկնարկել է նրանց երկրորդ հանդիպումը։