ԵՐԵՎԱՆ, 25 սեպտեմբերի – Sputnik. ՀՀ ԱԺ «Հայաստան» խմբակցության պատգամավոր Թադևոս Ավետիսյանը ձերբակալվեց։ Տեղեկությունը հայտնում է փաստաբան Արսեն Բաբայանը։
Ավելի վաղ հայտնել էինք, որ պատգամավորը Էրեբունու ոստիկանական բաժին է բերման ենթարկվել Երևանի փողոցներից մեկում անհնազանդության ակցիա իրականացնելու ժամանակ։
«Եթե չհիմնավորեն, որ Թադևոս Ավետիսյանը կատարում էր առերևույթ հանցագործություն և նրան ձերբակալել են անմիջականորեն ծագած հիմնավոր կասկածի հիմքով, ապա ձերբակալողները, նրանց այդպիսի հրաման տվողները պետք է ենթարկվեն քրեական պատասխանատվության»,– գրել է Բաբայանը ֆեյսբուքյան էջում:
ՀՀ առաջին վարչապետ, Ազգային կոմիտեի անդամ Վազգեն Մանուկյանը երեկ Հանրապետության հրապարակում հրավիրված հանրահավաքի ժամանակ հայտարարեց, որ երեք օր շարունակ Հայաստանը պարալիզացվելու է։ Քաղաքացիները վաղ առավոտից անհնազանդության ակցիաներ են իրականացնում Երևանում` փակելով փողոցները։ Կարմիրբերետավորները քաղաքացիներին բերման են ենթարկում` բիրտ ուժ կիրառելով նրանց նկատմամբ։
Հիշեցնենք՝ սեպտեմբերի 19–ին Արցախի դեմ սանձազերծված ադրբեջանական նոր ագրեսիայի ֆոնին Երևանում մասշտաբային ցույցեր են սկսվել։ Մարդիկ պատասխան են պահանջում ՀՀ իշխանություններից Արցախի հարցում դրսևորած անգործության համար։
Համաժողովրդական շարժումը համակարգելու համար ազգային կոմիտե է ձևավորել, որում ընդգրկված են Հայկ Մամիջանյանը (Ազգային ժողովի «Պատիվ ունեմ» խմբակցության ղեկավար), Ավետիք Չալաբյանը («ՀայաՔվե» նախաձեռնության համահիմնադիր), Անդրանիկ Թևանյանը («Մայր Հայաստան» դաշինքի ղեկավար), Իշխան Սաղաթելյանը («Հայաստան» խմբակցության պատգամավոր)։