ԵՐԵՎԱՆ, 24 սեպտեմբերի – Sputnik. Երևանի Հանրապետության հրապարակում հանրահավաքից հետո մասնակիցները քալերթով շարժվեցին դեպի ՀՀ ՆԳՆ շենքի մոտ։ Տեղում նրանց սպասում էին ոստիկանները` տարբեր կողմերից պատնեշ կազմած, որ թույլ չտան մոտենալ շենքին։ Այստեղ ակցիայի մասնակիցները սկսեցին վանկարկել «ամոթ», «Արցախ», «Նիկոլ, դավաճան»։
«ՀայաՔվե» նախաձեռնության համակարգող, Ազգային կոմիտեի անդամ Ավետիք Չալաբյանը, դիմելով ոստիկաններին, հիշեցրեց` նրանք երդվել են ծառայել Հայաստանի Հանրապետությանն ու պարտավոր են պաշտպանել իրենց երկիրը։
«Մի՛ փորձեք այս պետությունը հանձնած իշխանությանը պաշտպանել մեզանից։ Օրվա ընթացքում հաճախ բախվում եք մեզ հետ, բռնությունների եք դիմում, մի՛ արեք, տղե՛րք ջան, մենք էստեղ ենք ոչ միայն մեր երեխեքի, այլև ձեր երեխեքի համար։ Մենք չենք եկել իշխանության համար, մեր թշնամին մի մարդ է։ Խնդրում եմ ձեզ, մի՛ դիմեք բռնության, օրվա ընթացքում հանդիպում եք մեզ, մի՛ դիմեք բռնության, և երկրորդը, եթե զգում եք, որ չեք դիմանում սրան, դիմում գրեք, դուրս եկեք»,– ասաց Չալաբյանը։
Նա խոստացավ` ով դիմում գրի, դուրս գա, իշխանափոխությունից հետո իրենց կվերադարձնեն համակարգ, իսկ ով մնա ու շարունակի բռնությունները, հեռացվելու է։
Հիշեցնենք՝ սեպտեմբերի 19–ին Արցախի դեմ սանձազերծված ադրբեջանական նոր ագրեսիայի ֆոնին Երևանում մասշտաբային ցույցեր են սկսվել։