ԵՐԵՎԱՆ, 24 սեպտեմբերի – Sputnik. Երևանի ավագանու կազմում ներկայացված կլինի 5 ուժ։ Այսօր Կենտրոնական ընտրական հանձնաժողովն արտահերթ նիստում ամփոփեց ավագանու ընտրությունների արդյունքները։ ՀՀ ԿԸՀ–ն արձանագրեց, որ 824,317 ընտրողից քվեարկությանը մասնակցել է 234,442 մարդ, այսինքն` ընտրության իրավունք ունեցողների ընդամենը 28,44 տոկոսը։ Ընտրությունների վերջնական արդյունքներն այսպիսին են.
1.
«Քաղաքացիական պայմանագիր» կուսակցություն` 75,494 (32,57%),2.
«Ազգային առաջընթաց» կուսակցություն` 43,797 քվե (18,89%),3.
«Մայր Հայաստան» կուսակցությունների դաշինք` 35,807 քվե (15,47%),4.
«Հանրապետություն» կուսակցություն` 26,233 քվե (11,32%),5.
«Հանրային ձայն» կուսակցություն` 22,447 (9,68%):ԿԸՀ–ն արձանագրեց, որ առանձին ընտրախախտումները որևէ ազդեցություն չեն ունեցել ավագանու ընտրությունների ընդհանուր արդյունքի վրա։
Ամփոփելով Երևանի ավագանու ընտրությունների վերջնական արդյունքները` ԿԸՀ-ն հայտնեց, թե որ ուժը քանի մանդատ ստացավ։ Պատկերը հետևյալն է.
«Քաղաքացիական պայմանագիր» կուսակցություն` 24,
«Ազգային առաջընթաց» կուսակցություն` 14,
«Մայր Հայաստան» կուսակցությունների դաշինք` 12,
«Հանրապետություն» կուսակցություն` 8,
«Հանրային ձայն» կուսակցություն` 7 մանդատ։
Հիշեցնենք` Երևանում սեպտեմբերի 17–ին ավագանու ընտրություններ անցկացվեցին, որոնց մասնակցեցին 13 կուսակցություն և 1 դաշինք։ Քաղաքական ուժերից որևէ մեկին չհաջողվեց 50+ տոկոս քվե հավաքել, բայց նրանցից 5–ը, այնուամենայնիվ, հաղթահարեցին անցողիկ շեմը։
Սեպտեմբերի 22-ին հայտնի դարձավ, որ Երևանի 10 ընտրատարածքային ընտրական հանձնաժողովներն ամփոփել են 78 տեղամասերում իրականացված վերահաշվարկի արդյունքները։ «Քաղաքացիական պայմանագիր» կուսակցության ձայներն ավելացել են 31 քվեաթերթիկով, «Ազգային առաջընթաց» կուսակցության ձայները` 32–ով, իսկ «Մայր Հայաստան» դաշինքինը` 67–ով։