ԵՐԵՎԱՆ, 24 սեպտեմբերի – Sputnik. Հայաստանի ոստիկանապետ Արամ Հովհաննիսյանը համաձայն չէ, թե անհնազանդության ակցիաները ցրելիս ոստիկաններն անհամաչափ ուժ են կիրառում։ Լրագրողների հետ զրույցում նա հայտարարեց, թե անհամաչափ ուժ չի կիրառվել, ում հանդեպ կիրառվել է, կարող է գալ ու հաղորդում ներկայացնել։
Նշենք, որ Հանրապետության հրապարակից հանրահավաքի մասնակիցները երթով քայլեցին դեպի ոստիկանության շենք` իրենց բողոքն արտահայտելու ոստիկանների գործողությունների դեմ։ Երթի մասնակիցներին շենքի մոտ մեծ թվով ոստիկաններ էին սպասում, այդ թվում` Հայաստանի ոստիկանապետ Արամ Հովհաննիսյանը։
Ինչ վերաբերում է անչափահասի մասնակցությամբ տեսանյութին, որը լայնորեն տարածվեց ու քննարկվեց համացանցում, Հովհաննիսյանը նշեց` չի տեսել։ Նշենք, որ տարածված տեսանյութում ոստիկանը բերման էր ենթարկում անչափահաս տղայի` բիրտ ուժ կիրառելով, վիզն ուժեղ սեղմելով։ Լրագրողը դիտարկում արեց, թե ոստիկանը խեղդում էր տղային, Հովհաննիսյանն էլ չհամաձայնեց նրա հետ։
«Դա ձեր երևակայությունն է, որ խեղդում էր, միգուցե բերման էր ենթարկում։ Ես չեմ տեսել»,– ասաց Հայաստանի ոստիկանապետը։
Ինչ վերաբերում է Լևոն Քոչարյանի և ոստիկանների միջադեպին, Հովհաննիսյանն ասաց` ծառայողական քննություն է նշանակվել, կպարզվի։
Հիշեցնենք՝ սեպտեմբերի 19–ին Արցախի դեմ սանձազերծված ադրբեջանական նոր ագրեսիայի ֆոնին Երևանում մասշտաբային ցույցեր են սկսվել։
Սեպտեմբերի 22–ի առավոտից Երևանի տարբեր վարչական շրջաններում քաղաքացիները անհնազանդության ակցիաներ էին իրականացնում։ Կարմիրբերետավորներն Ամիրյան փողոցից բերման ենթարկեցին ցուցարարների մի մասին։ Նրանց թվում էր նաև ՀՀ երկրորդ նախագահ Ռոբերտ Քոչարյանի որդին` Լևոն Քոչարյանը։
Լրատվամիջոցների ֆիքսած կադրերում երևում է, որ ոստիկանները Լևոն Քոչարյանին բերման ենթարկելիս մեքենայի մեջ ուժեղ հարվածներ են հասցնում նրան։
Ավելի ուշ հայտնի դարձավ, որ Քոչարյանին տեղափոխել են «Նաիրի» ԲԿ։ Նրա մոտ ախտորոշվել է փակ գանգուղեղային վնասվածք` ուղեղի ցնցում:
Սեպտեմբերի 23–ին Լևոն Քոչարյանի պաշտպան Ալեքսանդր Կոչուբաևը հայտնեց, որ ՀՀ երկրորդ նախագահ Ռոբերտ Քոչարյանի որդին` Լևոն Քոչարյանը, ձերբակալվել է 4 կարմիրբերետավորի ծեծելու համար։
Միաժամանակ փաստաբանը Լևոն Քոչարյանին խոշտանգելու փաստով հաղորդում էր ներկայացրել, սակայն փաստաբանական խումբը սեպտեմբերի 24–ին հետ է վերցրել բողոքը, քանի որ այն պետք է քններ դատավոր Մասիս Մելքոնյանը, իսկ վերջինս, փաստաբանների պնդմամբ, ակնհայտ քաղաքականացված դատավոր է։