Ադրբեջանը միջանցք է տրամադրում զինաթափված հայ զինծառայողների համար

ԵՐԵՎԱՆ, 24 սեպտեմբերի – Sputnik. Ադրբեջանը միջանցք է տրամադրում զինաթափված հայ զինծառայողներին Արցախից դուրս բերելու համար։ Այս մասին գրում է Sputnik Ադրբեջանը` վկայակոչելով Ադրբեջանի ներքին գործերի նախարարությանը։

Նշվում է, որ ելքը կապահովվի Ստեփանակերտ–Լաչին և Քարվաճառ–Վարդենիս ուղղություններով։ Զինծառայողները դուրս կգան ավտոբուսներով և անձնական տրանսպորտով։

Ավելի վաղ Արցախի տեղեկատվական շտաբը հայտնել էր, որ արցախցի այն ընտանիքները, որոնք ռազմական գործողությունների հետևանքով անօթևան են մնացել և հանրապետությունից դուրս գալու ցանկություն ունեն, կտեղափոխվեն ՀՀ։

Ընտանիքների տեղափոխումը Հայաստանի Հանրապետություն կիրականացվի ՌԴ խաղաղապահների ուղեկցությամբ:

Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական զինուժը շփման գծի ողջ երկայնքով խախտեց հրադադարը` հասցնելով հրթիռահրետանային հարվածներ։

Ադրբեջանի պաշտպանության նախարարությունը հայտարարեց, թե լոկալ բնույթի հակաահաբեկչական միջոցառումներ է անցկացնում։

Ադրբեջանական ագրեսիայի հետևանքով առնվազն 200 զոհ և ավելի քան 400 վիրավոր կա։

Սեպտեմբերի 20–ին հայտնի դարձավ, որ Արցախի իշխանություններն ընդունել են ՌԴ խաղաղապահ առաքելության զորակազմի հրամանատարության՝ կրակի դադարեցման վերաբերյալ առաջարկությունը:

Սեպտեմբերի 21–ին ՌԴ խաղաղապահների միջնորդությամբ ադրբեջանական Եվլախում կայացավ Արցախի ու Ադրբեջանի ներկայացուցիչների հանդիպումը։