ԵՐԵՎԱՆ, 23 սեպտեմբերի – Sputnik. ԱՄՆ–ն դեմ է ԼՂ–ում ուժի կիրառմանը՝ համարելով, որ նման մոտեցումը հակասում է տարածաշրջանում արդար խաղաղության հասնելու ջանքերին։ Այս մասին հայտարարել է ԱՄՆ պետքարտուղար Էնթոնի Բլինկենը Նյու Յորքում ՄԱԿ–ի Գլխավոր ասամբլեայի բարձր մակարդակի միջոցառումների ավարտին կայացած մամուլի ասուլիսի ժամանակ: Տեղեկությունը հայտնում է ՌԻԱ Նովոստին։
«Մենք ցանկանում ենք հստակ ասել, որ ուժի կիրառումն անընդունելի ենք համարում։ Այն հակասում է այն ջանքերին, որոնք մենք գործադրում ենք տարածաշրջանում։ Ավելի կարևորն այն է, որ երկու երկրներն էլ ջանքեր են գործադրում տարածաշրջանում արդար խաղաղություն հաստատելու համար»,– ասել է Բլինկենը:
Նա նաև մտահոգություն է հայտնել ԼՂ–ում հումանիտար իրավիճակի համար:
«Ես մտահոգված եմ դեպի ԼՂ մարդասիրական կազմակերպությունների անարգել հասանելիությունն ապահովելու անհրաժեշտությամբ։ Այս հարցը ևս մեզ համար առաջնային է»,– ընդգծել է նա։
ՄԱԿ–ի Գլխավոր ասամբլեայի շրջանակներում ԱՄՆ պետքարտուղար Էնթոնի Բլինկենը ԼՂ իրավիճակի մասին խոսել է նաև Թուրքիայի ԱԳ նախարար Հաքան Ֆիդանի հետ։
Հանդիպման ընթացքում քննարկվել են նաև հացահատիկային գործարքը, ՆԱՏՕ–ին Շվեդիայի անդամակցությունը և Անկարայի ու Վաշինգտոնի երկկողմ հարաբերությունները:
Նշվում է, որ հանդիպումը տևել է մոտ 45 րոպե:
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական զինուժը շփման գծի ողջ երկայնքով խախտեց հրադադարը` հասցնելով հրթիռահրետանային հարվածներ։
Ադրբեջանի պաշտպանության նախարարությունը հայտարարեց, թե լոկալ բնույթի հակաահաբեկչական միջոցառումներ է անցկացնում։
Ադրբեջանական ագրեսիայի հետևանքով առնվազն 200 զոհ և ավելի քան 400 վիրավոր կա։
Սեպտեմբերի 20–ին հայտնի դարձավ, որ Արցախի իշխանություններն ընդունել են ՌԴ խաղաղապահ առաքելության զորակազմի հրամանատարության՝ կրակի դադարեցման վերաբերյալ առաջարկությունը:
Սեպտեմբերի 21–ին ՌԴ խաղաղապահների միջնորդությամբ ադրբեջանական Եվլախում կայացավ Արցախի ու Ադրբեջանի ներկայացուցիչների հանդիպումը։