ԵՐԵՎԱՆ, 22 սեպտեմբերի – Sputnik. ՀՀ ոստիկանությունը, բիրտ ուժ կիրառելով, բերման է ենթարկում վաղ առավոտից Երևանում ճանապարհներ փակելու ակցիաներ իրականացնող քաղաքացիներին։ Կարմիրբերետավորները բերման ենթարկեցին Սարյան–Բուզանդ փողոցները փակած քաղաքացիներից մի քանիսին, այդ թվում՝ «Մայր Հայաստան» դաշինքի ղեկավար Անդրանիկ Թևանյանին։
Բերման ենթարկելու դեպքեր են եղել նաև Մյասնիկյան պողոտայում։
Երևանի մի շարք փողոցներում կենտրոնացած են բազմաթիվ ոստիկանական ուժեր, այդ թվում՝ Հանրապետության հրապարակում։
Անդրանիկ Մարգարյանի անվան դպրոցի (գտնվում է Սարյան փողոցում) աշակերտների մի մասը դասադուլ սկսեց և միացավ բողոքի ակցիային։
Հիշեցնենք՝ սեպտեմբերի 19–ին Արցախի դեմ սանձազերծված ադրբեջանական նոր ագրեսիայի ֆոնին Երևանում մասշտաբային ցույցեր են սկսվել։ Մարդիկ պատասխան են պահանջում ՀՀ իշխանություններից Արցախի հարցում դրսևորած անգործության համար։
ՀՀ առաջին վարչապետ Վազգեն Մանուկյանը երեկ հայտարարեց, որ սեպտեմբերի 22-ի առավոտից զանգվածային անհնազանդության ակցիաներ են անցկացվելու։ Համաժողովրդական շարժումը համակարգելու համար սկսել են ազգային կոմիտե ձևավորել։ Այն պետք է 11 հոգուց կազմված լինի, այս պահին դեռ 5 հոգու կազմն է հայտնի` Հայկ Մամիջանյան, Ավետիք Չալաբյան, Անդրանիկ Թևանյան, Իշխան Սաղաթելյան։